Рабийә қадир ханим: «хитайниң туғқанлиримни тутқун қилиши дава йолумни тосалмайду!»

Мухбиримиз әзиз
2017-11-14
Елхәт
Пикир
Share
Принт

Йеқинда уйғур миллий давасиниң йетәкчиси рабийә қадир ханимниң туғқанлиридин 30 нәччә кишини сақчиларниң елип кәткәнлики һәққидики хәвәрләр ғәрб дунясидики чоң ахбарат васитилиридә кәң йәр алғандин кейин, уйғурлар дияридики сиясий контроллуқниң қайси дәриҗигә берип йәткәнликини көрситидиған бир рошән мисалға айланған иди.

14-Ноябир ройтерс агентлиқи, хәлқара кәчүрүм тәшкилати қатарлиқлар бу һәқтә мәхсус мәлуматлар берип, уйғурлар дияридики сиясий вә мәдәнийәт саһәсидә әвҗ еливатқан тәқиб қилишни тонуштурди. Ройтерис агентлиқиниң бүгүнки хәвиридә ейтилишичә, улар бу вәқә тоғрилиқ үрүмчи шәһиридики һөкүмәт тармақлири билән алақиләшкәндә улар өзлириниң бу иштин хәвәрсиз икәнликини ейтип, бу һәқтә пикир қилиштин өзини елип қачқан.

Хәлқара кәчүрүм тәшкилатиниң бу һәқтики мураҗиәтнамисидә көрситилишичә, сақчи даирилири елип кәткәнләр ичидә рабийә ханимниң биваситә туғқанлири вә қериндашлири болуп, уларниң бәзилири техи йеқинда түрмидин қоюп берилгәнләр икән. Мураҗиәтнамидә бу қетим тутулғанларниң исим-фамилиси вә җинс айримисиму тәпсилий тонуштурулған.

Рабийә қадир ханим бу мунасивәт билән зияритимизни қобул қилип, булардин башқа йәнә балилириниң туғқанлири вә улар билән нормал алақидә болған көплигән кишиләрниңму тутқун қилинғанлиқини билдүрди.

У бу һәқтә сөз қилип, нөвәттә бу хил тутқунниң һазир өзигила әмәс, һәммила уйғур аилисигә қәдәр йейиливатқанлиқини тәкитләп, «хитай һөкүмити пүткүл уйғур миллитини дүшмән көрүш билән биргә мениң уйғур миллий даваси йолидики һәрикәтлиримни мушундақ усуллар арқилиқ тосмақчи болуватиду. Мән һаятла болидикәнмән, хитайниң бу хил рәзил мәқсити һәргизму әмәлгә ашмайду. Мән дава йолумдики паалийәтләрни һәргиз тохтатмаймән» деди.

Пикирләр (0)
Share
Толуқ бәт