Rabiye qadir xanim: "Xitayning tughqanlirimni tutqun qilishi dawa yolumni tosalmaydu!"

Muxbirimiz eziz
2017-11-14
Élxet
Pikir
Share
Print

Yéqinda Uyghur milliy dawasining yétekchisi rabiye qadir xanimning tughqanliridin 30 nechche kishini saqchilarning élip ketkenliki heqqidiki xewerler gherb dunyasidiki chong axbarat wasitiliride keng yer alghandin kéyin, Uyghurlar diyaridiki siyasiy kontrolluqning qaysi derijige bérip yetkenlikini körsitidighan bir roshen misalgha aylan'ghan idi.

14-Noyabir roytérs agéntliqi, xelq'ara kechürüm teshkilati qatarliqlar bu heqte mexsus melumatlar bérip, Uyghurlar diyaridiki siyasiy we medeniyet saheside ewj éliwatqan teqib qilishni tonushturdi. Roytéris agéntliqining bügünki xewiride éytilishiche, ular bu weqe toghriliq ürümchi shehiridiki hökümet tarmaqliri bilen alaqileshkende ular özlirining bu ishtin xewersiz ikenlikini éytip, bu heqte pikir qilishtin özini élip qachqan.

Xelq'ara kechürüm teshkilatining bu heqtiki muraji'etnamiside körsitilishiche, saqchi da'iriliri élip ketkenler ichide rabiye xanimning biwasite tughqanliri we qérindashliri bolup, ularning beziliri téxi yéqinda türmidin qoyup bérilgenler iken. Muraji'etnamide bu qétim tutulghanlarning isim-familisi we jins ayrimisimu tepsiliy tonushturulghan.

Rabiye qadir xanim bu munasiwet bilen ziyaritimizni qobul qilip, bulardin bashqa yene balilirining tughqanliri we ular bilen normal alaqide bolghan köpligen kishilerningmu tutqun qilin'ghanliqini bildürdi.

U bu heqte söz qilip, nöwette bu xil tutqunning hazir özigila emes, hemmila Uyghur a'ilisige qeder yéyiliwatqanliqini tekitlep, "Xitay hökümiti pütkül Uyghur millitini düshmen körüsh bilen birge méning Uyghur milliy dawasi yolidiki heriketlirimni mushundaq usullar arqiliq tosmaqchi boluwatidu. Men hayatla bolidikenmen, xitayning bu xil rezil meqsiti hergizmu emelge ashmaydu. Men dawa yolumdiki pa'aliyetlerni hergiz toxtatmaymen" dédi.

Toluq bet