Rabiye qadir xanim teywen ziyaritini emeldin qaldurdi

Muxbirimiz eziz
2017-02-15
Élxet
Pikir
Share
Print

Teywende chiqidighan "Teybéy waqti" gézitining xewer qilishiche dunya Uyghur qurultiyining re'isi rabiye qadir xanim teywenni ziyaret qilish pilanini emeldin qaldurghan.

"Teywen ittipaqdashlar jem'iyiti" ning mezkur gézitke bildürüshiche, hazir yaponiyede ziyarette boluwatqan rabiye xanimning bu qarari "Bezi shexslerning bu ishqa biwasite arilashqanliqi" seweblik élin'ghan iken.

Melum bolushiche, buningdin birnechche kün awwal rabiye xanim bu heqte soralghan so'allargha qarita "Men teywenning ehwaligha izchil köngül bölüp kéliwatimen, shuning bilen birge özümni prézidént sey yingwénning aktip qollighuchisi dep qaraymen. Shuning üchün teywenni ziyaret qilishni bekmu xalaymen" dégen idi.

"Teywen ittipaqdashlar jem'iyiti" diki ehwaldin xewerdar zatlarning bildürüshiche "Bir qisim alaqidar shexsler rabiye qadir bilen ayrim söhbetleshken hemde uni hazirche teywenni ziyaret qilishtin waz kéchishke maqul keltürgen." emma bu "Alaqidar zatlar" ning kimler ikenliki tilgha élinmighan.

Rabiye xanim bu heqte toxtilip "Hazir teywenni ziyaret qilishimning köngüldikidek peyti emeslikini nezerge élip, bu qétimqi ziyaret pilanini bikar qiliwettim" dégen.

Melum bolushiche, rabiye xanimning teywen ziyaritige béyjing da'iriliri izchil qarshi turuwatqan bolup, yéqinda xitay merkiziy hökümitige qarashliq teywen ishliri ishxanisi "Rabiye qadirning teywen ziyariti ikki terep munasiwitini yamanlashturidu" dep ipade bildürgen idi.

Toluq bet