Уйғур районида рамизан һарписида "террорлуқ"қа қарши туруш бирләшмә маневири өткүзүлди

Мухбиримиз әркин
2017-05-26
Share

Хитай һөкүмити мусулманларниң ибадәт ейи- муқәддәс рамизан һарписида азадлиқ армийә, қораллиқ сақчи, чегра қоғдаш қисимлири, биңтүән вә җ х органлириниң бирләшмә "террорлуқ"қа қаши маневири өткүзгән.

"тәңритағ " ториниң хәвиридә көрситишичә, "чегра бирләшмә һәрикәт‏-2017‏‏" дәп нам берилгән маневир үрүмчи билән или областида өткүзүлгән. Хәвәрдә, маневирниң конкрет орни тилға елинмиған болсиму, бирақ 4 миң кишилик маневирниң асаслиқ мәйдани үрүмчидә, тармақ мәйдани или областида өткүзүлгәнликини билдүрүп, маневирни уйғур аптоном районлуқ партком, һөкүмәт, хәлқ қурултийи, сияси кеңәш, шинҗаң һәрбий райони, биңтүән  вә қораллиқ сақчи қисим мәсуллириниң көргәнликини билдүргән.

Хәвәрдә ашкарилишичә, маневирда раст оқ ишлитилгән болуп, маневир хитай бирләшмә аманлиқ күчлириниң уйғур райониға суқунуп киргән аталмиш хәлқара террорлуқ тәшкилати әзалириниң қорал-ярақ йөткәш йоли вә чәтәлдики мәшқ базисиға һуҗум қилиш тәқлид қилинған.

Хитай һөкүмити шәрқий түркистан ислам һәрикити әзалириниң сүрийәдә қорал-ярақ тәлими вә әмилий уруш тәҗрибисигә еришип, уйғур районида "террорлуқ" һәрикити елип бериш пилани барлиқини илгири сүрүп кәлгән болсиму, бирақ бу қаришини испатдиған һечқандақ бир дәлил оттуриға қоюп бақмиған. Униң  25‏-майдики бирләшмә маневири дәл мусулманларниң муқәддәс ибадәт ейи-рамизанниң һарписиға тоғра кәлгән. Даириләр маневирниң рамизанға тоғра келип қелишиға һечқандақ чүшәнчә бәрмигән болсиму, бирақ у, рамизанда қаттиқ бихәтәрлик тәдбирләрни алған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт