Xotende ramizan harpisida 22 Uyghurning tutqun qilin'ghanliqi ilgiri sürüldi

Muxbirimiz erkin
2017-05-26
Share

Xotende ramizan harpisida 22 neper Uyghurning muqimliq seweblik tutqun qilin'ghanliqi ilgiri sürüldi. D u q ning bildürüshiche, bu 22 Uyghur yéqinqi bir hepte ichide xoten shehiri, qariqash nahiyesi we xoten-qeshqer tashyolining xotendin chiqish éghizliridiki tekshürüsh ponkitlirida tutqun qilin'ghan.

Biraq d u q uchurida, tutqunlarning ismi, jinsi, yéshi we salahiyitige da'ir bashqa tepsilatlar tilgha élinmighan. D u q bayanatchisi dilshat rishitning jüme küni radiyomizgha bildürüshiche, tutqunlardin 7 kishi xoten ayrodromida tarqaq hejge mangghan dégen guman bilen tutup qélin'ghan. Ikki kishi qariqash nahiyeside ramizanni teshwiq qilghan dep tutqun qilin'ghan. Qalghan kishiler xoten-qeshqer tash yolidiki tekshürüsh ponkitida axturulup, yénidin diniy kitablar chiqip qalghanliqi üchün "Qanunsiz diniy matériyal saqlighan" dep tutqun qilin'ghan. Muxbirimiz  xoten yerlik saqchi organlirigha téléfon qilip, mezkur xewerni delilleshke tirishqan bolsimu, biraq buninggha muwappeq bolalmidi.

Xitay hökümiti her yili ramizan harpisida jaylargha höjjet chürüshüp, meschit we shexslerning diniy pa'aliyitini kontrol qilishni kücheytip kelgen, réstoranlarning tijariti, kimler roza tutsa bolidu, kimler tutsa bolmaydighanliqighimu ariliship, xilapliq qilghuchilarni qattiq jazalap kelgen idi. Dilshat rishitning bildürüshiche, xoten ayrodromida tutqun qilin'ghan 7 kishining hemmisining yéshi 60 tin halqighan kishilerken.

Dilshat rishit, xitayning heryili ramizanda Uyghurlarni qattiq qamal qilip, uning diniy erkinlikige téximu qattiq buzghunchiliq qilishni bir adetke aylanduruwalghanliqini bildürgen bolsimu, biraq xitay hökümiti bu xil tenqidlerni izchil ret qilip, özining "Diniy radikalliq" qa qarshi turuwatqanliqini ilgiri sürüp keldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet