Хитай рамизан һарписида уйғур елидики кәнттә туруш хизмәт гуруппилириға муқимлиқ вәзиписи тапшурди

Мухбиримиз гүлчеһрә
2018.05.16
Share on WhatsApp
Share on WhatsApp

“шинҗаң гезити” ниң чаршәнбә тарқатқан хәвиригә қариғанда, 15-май күни уйғур аптоном районлуқ партком йиғин ечип, аптоном районниң ‛‛әлрайини билиш, әлгә нәп йәткүзүш, әлни майил қилиш‚‚ бойичә кәнттә туруш хизмитиниң асаслиқ вәзиписиниң җайларда узун муддәтлик муқимлиқни ишқа ашурушни нишан қилидиғанлиқини тәкитлигән.

Хитайниң кәнттә туруш хизмити рәһбәрлик гурупписиға уйғур аптоном районлуқ парткомниң секретари чүәнго, шөһрәт закир қатарлиқлар биваситә рәһбәрлик қилидикән.

Рамизанниң һарписида ечилған бу йиғинда ‛‛әлрайини билиш, әлгә нәп йәткүзүш, әлни майил қилиш‚‚ бойичә кәнттә туруш хизмитиниң дәриҗисини омумйүзлүк өстүрүш вә кеңәйтишкә түрткә болуш, иҗтимаий муқимлиқни қоғдашни ядролуқ вәзипә қилиш қатарлиқлар конкиретлаштурулған.

Хитайниң кадирларни асасий қатламға чүшүрүп деһқанларниң өйлиридә турғузуштин ибарәт бу сиясити бултурдин башлап күчәйтилди. Гәрчә даириләр уларниң вәзиписиниң милләтләр иттипақлиқини күчәйтиш, намратлиқтин қутулдурушқа күч қошуп, кадирлар билән амминиң мунасивитини қоюқлаштуруш ролини җари қилдуруш икәнликини тәшвиқ қилип кәлсиму, әмма хитай кадирлириниң туғқанлишиш намида йәрлик аһалиләрниң өйлиригә орунлишип, уйғур аһалиләрниң күндилик һаятиғичә арилишиши вә уларниң диний һәм идийәви әһвали қатарлиқ тәрәплирини назарәт қилиши муһаҗирәттики уйғурларда күчлүк наразилиқ инкаслирини қозғиған иди.

Хитай даирилири кәнтләргә чүшкән кадирларниң бу һәрикәтлири кәнт аһалилири билән, турмуш, өгиниш қатарлиқ “бәштә биргә болуши” дәп атиған.

Мәтбуат хәвәрлиридин мәлум болушичә, бултурдин буян хитай һөкүмити бир милйондин артуқ кадирни сәпәрвәрликкә кәлтүрүп, уларниң йеза-қишлақлардики уйғур қатарлиқ хитай болмиған милләтләрниң өйлиридә “аз дегәндә бир һәптә биллә туруши” ни тәләп қилған. Бу кадирлар өзлири турған уйғур аилилиридә хитай һөкүмитиниң милләтләр иттипақлиқи, диний әсәбийликкә қарши туруш, җуңхуа мәдәнийитини қанат яйдуруш қатарлиқ сиясәтлирини тәшвиқ қилмақта.

Кишилик һоқуқни көзитиш тәшкилати хитай һөкүмитиниң кадирларни уйғурларниң өйлиридә турғузуш сиясити һәққидә мәхсус доклат елан қилип, хитай һөкүмитини, хитай кадирлириниң бу хилдики “мәҗбурлаш характерлик зиярәт” паалийәтлири арқилиқ уйғурларниң инсаний һәқлиригә қарита садир қилиниватқан бу хил дәпсәндичиликини дәрһал тохтитишқа чақирған иди.

Рамизан һарписида пәйзиваттин зияритимизни қобул қилған бир уйғур кадир һазир аилиләрдә туруватқан кадирларниң мусулман аилилирини роза тутмаслиққа риғбәтләндүрүшни баш вәзипә қиливатқанлиқини ейтқан иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.