Xitay ramizan harpisida Uyghur élidiki kentte turush xizmet guruppilirigha muqimliq wezipisi tapshurdi

Muxbirimiz gülchéhre
2018.05.16
Share on WhatsApp
Share on WhatsApp

“Shinjang géziti” ning charshenbe tarqatqan xewirige qarighanda, 15-may küni Uyghur aptonom rayonluq partkom yighin échip, aptonom rayonning ‛‛elrayini bilish, elge nep yetküzüsh, elni mayil qilish‚‚ boyiche kentte turush xizmitining asasliq wezipisining jaylarda uzun muddetlik muqimliqni ishqa ashurushni nishan qilidighanliqini tekitligen.

Xitayning kentte turush xizmiti rehberlik guruppisigha Uyghur aptonom rayonluq partkomning sékrétari chü'en'go, shöhret zakir qatarliqlar biwasite rehberlik qilidiken.

Ramizanning harpisida échilghan bu yighinda ‛‛elrayini bilish, elge nep yetküzüsh, elni mayil qilish‚‚ boyiche kentte turush xizmitining derijisini omumyüzlük östürüsh we kéngeytishke türtke bolush, ijtima'iy muqimliqni qoghdashni yadroluq wezipe qilish qatarliqlar konkirétlashturulghan.

Xitayning kadirlarni asasiy qatlamgha chüshürüp déhqanlarning öyliride turghuzushtin ibaret bu siyasiti bulturdin bashlap kücheytildi. Gerche da'iriler ularning wezipisining milletler ittipaqliqini kücheytish, namratliqtin qutuldurushqa küch qoshup, kadirlar bilen ammining munasiwitini qoyuqlashturush rolini jari qildurush ikenlikini teshwiq qilip kelsimu, emma xitay kadirlirining tughqanlishish namida yerlik ahalilerning öylirige orunliship, Uyghur ahalilerning kündilik hayatighiche arilishishi we ularning diniy hem idiyewi ehwali qatarliq tereplirini nazaret qilishi muhajirettiki Uyghurlarda küchlük naraziliq inkaslirini qozghighan idi.

Xitay da'iriliri kentlerge chüshken kadirlarning bu heriketliri kent ahaliliri bilen, turmush, öginish qatarliq “Beshte birge bolushi” dep atighan.

Metbu'at xewerliridin melum bolushiche, bulturdin buyan xitay hökümiti bir milyondin artuq kadirni seperwerlikke keltürüp, ularning yéza-qishlaqlardiki Uyghur qatarliq xitay bolmighan milletlerning öyliride “Az dégende bir hepte bille turushi” ni telep qilghan. Bu kadirlar özliri turghan Uyghur a'ililiride xitay hökümitining milletler ittipaqliqi, diniy esebiylikke qarshi turush, jungxu'a medeniyitini qanat yaydurush qatarliq siyasetlirini teshwiq qilmaqta.

Kishilik hoquqni közitish teshkilati xitay hökümitining kadirlarni Uyghurlarning öyliride turghuzush siyasiti heqqide mexsus doklat élan qilip, xitay hökümitini, xitay kadirlirining bu xildiki “Mejburlash xaraktérlik ziyaret” pa'aliyetliri arqiliq Uyghurlarning insaniy heqlirige qarita sadir qiliniwatqan bu xil depsendichilikini derhal toxtitishqa chaqirghan idi.

Ramizan harpisida peyziwattin ziyaritimizni qobul qilghan bir Uyghur kadir hazir a'ililerde turuwatqan kadirlarning musulman a'ililirini roza tutmasliqqa righbetlendürüshni bash wezipe qiliwatqanliqini éytqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.