Amérikiliq ressam Uyghurlar teswirlen'ge eserliri bilen közge körün'gen

Muxbirimiz jüme
2015-01-03
Share


Amérikiliq ressam joy bostwik Uyghur élige kélip yerleshken we Uyghurlarning kündilik hayati - pa'aliyiti teswirlen'gen resimliri arqiliq rayon miqyasida közge körün'gen ressamlarning birige aylan'ghan.

"Xitay kündilik géziti" ning 1 - yanwardiki xewirige qarighanda, joy xanim amérikining arizona shtatidin bolup, 2011 - yili Uyghur élige a'ilisi bilen kélip yerleshken.

- 2014Yili 5 - dékabir béyjingda uning "Shinjang porti" namliq shexsiy körgezmisi échilghan.

Xewerde neqil qilishiche, u mundaq dégen: men a'ilem bille nurghun Uyghurlar yashaydighan bir mehellide yashaymiz. U, nurghun ademler "U yerge barmanglar, u yer bek xeterlik" deydighan mehelle idi. Emma u yerde bizning hayatimiz bek rahet ichide ötmekte. Qoshnilirimiz bizge bekmu dostane mu'amile qilidu.

Uning körgezmisi béyjingdiki "Béyjing amérika merkizi" de échilghan bolup, échilish murasimigha 20 ge yéqin Uyghurni öz ichige alghan, 100 dek adem qatnashqan.

Joy xanim shimaliy arizona uniwérsitétining sen'et we ispan tili kespini püttürgen we 2009 - yili tunji qétim Uyghur élige barghandin kéyin u yerni yaxshi orup qalghan.

Xewerde körsitishiche, u, Uyghur élide yüz bergen weqeler heqqide toxtalghandin kéyin: men hazirgha kelgüche u yerde héchqandaq xeterlik hadisige yoluqup baqmidim. Men u jayni bek yaxshi körimen. Kelgüside shimaliy shinjangni ziyaret qilishni oylawatimen dégen.

Joy xanim mexsus Uyghurlar téma qilin'ghan resimliri bilen közge körün'gen tunji amérikiliq ressam bolsa kérek.

Uning resimliri Uyghur éli boyiche ötküzülgen her xil körgezmilergimu tallan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet