Рәйһан әсәт харвард университетидики хитайларни зулумға қарши турушқа чақирди

Мухбиримиз ирадә
2020-07-09
Елхәт
Пикир
Share
Принт

Америкадики харвард университетиниң қанун кәспидә магистирлиқни пүттүргән уйғур адвокат рәйһан әсәт харварддики хитай оқуғучиларни хитайдики зулумға қарши аваз чиқиришқа чақирди. У 8-июл күни харвард университетиниң хәвәр тор бетидә «харварддики хитайлар чоқум зулумға қарши туруши керәк» мавзусида мақалә елан қилип, иниси әкбәр әсәт вә барлиқ уйғур миллити учраватқан зулумни йәнә бир қетим тәкитлиди.

«Бағдаш тори» ниң қурғучиси әкбәр әсәтниң хитай һөкүмити тәрипидин 15йиллиқ кесиветилгәнлики ашкариланғандин кейин, униң америкадики һәдиси рәйһан әсәт инисиға адаләт тәләп қилип һәрикәткә өткән. Униң һәрикити америка вә дуняниң һәрқайси җайлиридики мәктәпдашлириниң қоллишиға еришип, улар бирликтә америка һөкүмити вә хитай һөкүмитигә әкбәр әсәт һәққидә мураҗиәтнамә сунған.

Рәйһан әсәт елан қилған мақалисидә, юқиридикиләрниң әксичә харвард университетидики бир қанчә хитай мәктәпдаш өзиниң һесдашлиқини йошурун йәткүзгән болсиму, көп қисим хитайларниң аваз чиқармиғанлиқини баян қилған. У буниң көп хил сәвәби болсиму, әмма чәтәлләрдә маарип тәрбийәси көргән хитайларниң зулумға көз юммаслиқи керәкликини әскәрткән. У мундақ дегән: «ирқий адаләтсизлик хитайдиму бар, у йәрдә 1 милйондин артуқ адәм миллити яки дини сәвәбидин җаза лагерлириға соланған. Хитайлар вә америкалиқ хитайларниң қоллиши болмай туруп, хитайдики тилға елишқа болмайдиған бастуруш вә дөләт террорлуқини түгитиш қейин».

Рәйһан әсәт мақалиси ахирида харварддәк бир университетта оқуған оқуғучиларниң чоқум шуниңға лайиқ болуши, өзлири өгәнгән қиммәт қарашлири бойичә һәрикәт қилиши керәкликини әскәртип «мән харварддики хитай оқуғучилириниң виҗданиға мураҗиәт қилимән. Һөкүмитиңизниң вәһшийликигә қарши сөзләң. Әгәр харварддики барлиқ хитай оқуғучилар иттипақлишип һәрикәт қилса, хитай һөкүмити уларни коллектип җазалимайду. Бир иҗтимаий һәрикәтниң узун давамлишиши вә мувәппәқийәткә еришиши үчүн көп сандики кишиләр бошашмай қоллиши керәк. Мән харвардтики хитай оқуғучиларни уйғурлар билән бир сәптә турушқа, хитайдики ирқий адаләтсизликни йорутушқа вә ирқий қирғинчилиққа қарши турушқа чақиримән» дәп язған.

Пикирләр (0)
Share
Толуқ бәт