Rizwan'gül nurmuhemmed yéngi zélandiye taratqulirida xitayning inisini qoyup bérishini telep qildi

Muxbirimiz erkin
2020-08-11
Share

Yéngi zélandiyelik Uyghur grazhdan rizwan'gül nurmuhemmed yéngi zélandiye taratqulirida xitayning 2017-yili tutqun qilin'ghan inisi mewlan nurmuhemmedni qoyup bérishini telep qilghan. Uning 8-awghust küni yéngi zélandiyediki "1-Xewerler" téléwiziye qanilining ziyaritini qobul qilghanda tekitlishiche, uning inisi 2017-yili 1-ayda Uyghur diyaridiki bir réstoranda chüshlük tamaq yewatqanda tutqun qilin'ghan bolup, saqchilar uning néme üchün tutqun qilin'ghanliqigha héchqandaq chüshenche bermigen.

Xewerde, mewlanning türkiyede oqushi uning tutqun qilinishigha seweb bolghan bolushi mumkinliki tekitlen'gen. Rizwan'gül inisi üchün torda imza toplash pa'aliyiti bashlighan bolup, hazirgha qeder uninggha 40 mingdin artuq adem imza qoyghan. "1-Xewerler" qanilining qeyt qilishiche, xitayning yéngi zélandiyede turushluq elchixanisi mezkur qanalgha bergen bayanatida, mewlan nurmuhemmedning "Bölgünchilik" bilen eyiblinip késilgenliki, uning hazir shixenzediki bir türmide jaza mudditini ötewatqanliqini bildürgen.

Xitay elchixanisi "1-Xewerler" qaniligha qayturghan yazma inkasida  "Siler tilgha alghan shexs bölgünchilik herikiti seweblik 2017-yili 8-ayda xitay edliye organliri teripidin 9 yilliq qamaqqa buyruldi" déyilgen. Lékin uningda mewlan nurmuhemmedning "Bölgünchilik" qilghanliqigha da'ir héchqandaq delil körsitilmigen. Xitay hökümiti 2017-yili bashlan'ghan chong tutqunda Uyghur serxillirini özining asasliq yoqitish nishani qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet