Rohéngga musulmanliri kömülgen besh chong gör tépilghan

Muxbirimiz jüme
2018-02-03
Share

"Xaffington pochtisi" xewerler torining körsitishiche, yéqinda birmaning rahine ölkiside qirghin qilin'ghan rohéngga musulmanliri opchi kömülgenliki ilgiri sürülgen yene besh chong gör tépilghan.

Xewerge qilinishiche, bular birma armiyisi teripidin qirghin qilin'ghan rohéngga musulmanliri kömülgen chong gör, dep qaralghan.
Xewerde birleshme agéntliqidin neqil élishiche, birmadiki qirghinchiliqtin qéchip nöwette bén'galda panahlan'ghan bir qisim rohénggaliqlar yuqirida tilghan élin'ghan chong görlerning rastliqini delilligen we bundaq görlerning yene köplükini éytishqan. 

Xewerge qarighanda, birma hökümiti bu xildiki chong görlerdin peqet birinila ten alghan bolsimu, buninggha 10 neper rohéngga "Térrorchisi" kömülgenlikini bildürgen.

Halbuki, rohéngga musapirliri birleshme agéntliqigha qilghan sözide ötken yili 27-awghust yüz bergen qirghinchiliqta 200 din artuq birma hökümet eskirining gu dar pyin yézisigha hujum qilghanliqi, kéyin qirghinchiliqta öltürülgenlerning jesitini bir yerge toplap, ularning qéshigha bashqilarni yéqin keltürmigenlikini bildürgen.

Birma hökümiti yillardin buyan rohéngga musulmanliri topliship yashaydighan rahine ölkiside "Térrorchilargha zerbe bérish" namida her xil shekildiki basturushni dawamlashturup kelgen.

Basturush 2016-yilining axiri ewjige chiqqan. Birma hökümet armiyisi rohéngga musulmanlirigha qaritilghan zorawanliq, qirghinchiliq heriketlirini kücheytken. Xewerlerde rohin'galiqlarning öy-makanliri köydürülüp, nurghunlighan bigunah ademning birma eskerliri teripidin qirghin qilin'ghanliqi ilgiri sürülgen. Köpligen rohénggaliqlar bén'galgha qéchip bériwalghan.

Hazirche qirghinchiliqta zadi qanchilik rohin'galiqlarning öltürülgenliki melum emes. Halbuki, birma hökümiti bu jeryanda peqet "Térrorchilar" ningla öltürülgenlikini ilgiri sürüp rohéngga musulmanlirigha qaritilghan irqiy qirghinchiliq qilmishlirini ten almighan.

Ötken yili öktebir b d t ning birma hökümitining qilmishini eyibleydighan qarari xitayning tosqunluqi seweblik royapqa chiqmighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet