Amérika prézidéntining dölet weziyiti boyiche doklat bérish murasimigha Uyghur pa'aliyetchisi roshen abbas teklip qilindi

Muxbirimiz irade
2020.02.04

Amérikadiki Uyghur pa'aliyetchisi roshen abbas xanim amérika prézidénti donald trampning amérika dölet mejliside amérika qoshma shtatlirining dölet weziyiti boyiche yilliq doklat bérish murasimigha teklip qilin'ghan. Roshen abbas xanim amérika awam palata ezasi marko rubiyoning teklipige bina'en bu murasimgha qatnishidiken.

Amérikida “State of the Union” dep bilinidighan bu yilliq yighilish amérika dölet mejlisining xizmet kaléndari boyiche yilning béshida ötküzülidighan bolup, yighinda amérika prézidénti amérikaning dölet weziyiti we bundin kéyinki siyasetliri boyiche muhim nutuq sözleydu. Prézidént tramp bu yilliq tutuqini 4-féwral seyshenbe küni axsham sözleydu. 

Amérika kéngesh palata ezasi marko rubiyo 3-féwral düshenbe küni özining resmiy tor bétide élan qilghan bayanatida özining bu qétim Uyghur pa'aliyetchisi roshen abbas we filorida shtatining bashliqi jenét nunézni özining méhmini süpitide bu yighin'gha teklip qilghanliqini jakarlidi. 

Sénator, yeni kéngesh palata ezasi marko rubiyo xitay hökümitining1 milyondin 3 milyon'ghiche bolghan Uyghur we bashqa musulman milletlerni lagérgha qamash bilen birge yürgüzüwatqan siyasetlirini qattiq tenqid qilip kelgen we “Uyghur kishilik hoquq qanun layihesi” ning maqullinishi üchün bashlamchiliq rol oynawatqan shexs idi.

U bayanatida özining roshen abbas we jenit nunizni amérika démokratiyesining intayin muhim en'enisi hésablinidighan bu yighin'gha teklip qilghanliqidin xursen bolghanliqini ipadilesh bilen birge, roshen xanimning Uyghurlarning kishilik hoquq dawasidiki harmas küreshchi we muhim yétekchi awazlarning biri ikenlikini, shu wejidin roshen abbas xanimning achisi gülshen abbasning lagérgha qamalghanliqini eskertip ötken. 

Roshen abbas xanimning amérikida yilda bir qétim ötküzülidighan bundaq nopuzluq murasimgha dewet qilinishi muhajirettiki Uyghurlarni söyündürdi. Bu heqtiki inkaslardin qarighanda amérikining siyaset yönilishining körsetküchi hésablinidighan bu yighin'gha Uyghur wekilning teklip qilinishining simwolluq ehmiyiti intayin zor iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.