Русийә украина мәсилисигә аит берлин йиғиниға қатнишишқа мақул болди

Мухбиримиз үмидвар
2015-01-04
Share


Русийә ташқи ишлар министирлики русийәниң 5 - январ күни германийәниң берлин шәһиридә өткүзүлидиған украина мәсилисигә аит хәлқаралиқ йиғинға қатнишидиғанлиқини билдүргән.

Итартасс агентлиқиниң хәвәр қилишичә, мәзкур йиғинға украина, германийә вә франсийә вәкиллири қатнишиду, русийә тәрәп йиғинға русийә ташқи ишлар министирликиниң мустәқил дөләтләр һәмдостлуқи ишлириға мәсул әмәлдари виктор сорокинни әвәтидикән.

Йиғинда асаслиқи украина вәзийити вә минск келишими мәсилиси муһакимә қилинидикән. Буниңдин башқа йәнә 15 - январ күни қазақистан пайтәхти астана шәһиридә украина, русийә, франсийә вә германийә рәһбәрлириниң қатнишиши билән мәхсус учришиш болиду. Украина президенти порошенко өзиниң бу йиғинға қатнишидиғанлиқини билдүргән, у астанада путин билән айрим учришиши мумкин икән.

Хәвәрләрдин мәлум болушичә, украина мәсилисигә аит бу йиғинларға хитай тәрәпниң вәкил қатнаштуридиғанлиқиға аит учурлар йоқ.

Шәрқий украинада өткичи исянчи күчләр билән украина армийәси арисида уруш партлиғандин буян 4 миңдин артуқ адәм өлүп бир түмәндин артуқ адәм яриланди. Өзлирини луганкс вә донетск хәлқ җумһурийәтлири дәп атиған русийәпәрәс күчләр йәнила өз идийисидин янмиған. Бу хил вәзийәт русийә билән ғәрб арисидики мунасивәтләргә изчил сәлбий тәсир көрситип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт