Rusiye “Da'ish” ning taylandta térrorluq hujum élip bérishi mumkinlikini agahlandurdi

Rusiye bixeterlik orgini tayland da'irilirige 10 neper islam döliti térrorchisining tayland chégrasigha suqunup kirgenlikini uqturup, ularning térrorluq hujumi élip bérishi mumkinlikini agahlandurghan.

Tayland saqchi da'irilirining xewiridin ashkarilinishiche, rusiye fédiratsiye bixeterlik idarisi u kishilerning bu yil öktebirde tayland chégrasigha kirgenlikini, taylandning bangkok we bashqa sayahetgahlirigha yétip barghanliqini bildürüp, ularning ichidin 2 kishining ghayib bolghanliqini ilgiri sürgen.

Rusiye tayland da'irilirige bergen melumatida yene, u kishilerning meqsiti rusiyeliklerge we rusiyege alaqidar nishanlargha hujum qilish ikenlikini bildürgen.

Rusiye bu yil séntebirde süriyediki islam döliti nishanlirigha hawa hujumi bashlighan. Arqidin islam döliti térrorluq guruhi öktebirde chüshüp ketken rusiye yoluchilar ayropilanini özlirining partlitip chüshürgenlikini élan qilghan idi.

Tayland saqchi da'iriliri jüme küni rusiyening taylandni agahlandurghanliqini étirap qildi. Tayland herbiy hökümet bayanatchisi wéntay suwaréWinthai Suvaree, “Hoduqup kétishning hajiti yoq. Amanliq küchlirimiz weziyetni kontrol qilip turuqluq. Hazirgha qeder islam döliti térrorchilirining tayland chégrasigha kirgenlikining héchqandaq béshariti yoq” dégen.