Rusiye misirdiki sayahetchilirini qayturup kélishke bashlidi

Muxbirimiz ümidwar
2015-11-09
Élxet
Pikir
Share
Print


Kéyinki 24 sa'et ichide misirda dem éliwatqan rusiyelik sayahetchilerdin 11 ming adem rusiyege qayturup kélin'gen bolup, bulardin bashqa yene köp sandiki rusiyilikler nöwet boyiche rusiyege qaytip kélishni kütmekte iken.

B b s agéntliqining xewirige qarighanda, rusiye yene misirdiki sayahetchilirining yük taqlirinimu qayturup kéliwatqan bolup, moskwadiki wnukowa ayrodromigha 30 tonna yük - taq élip kélin'gen.

31 - Öktebir küni rusiyening "A321" yoluchilar ayropilani misirning sharm - esh sheyx rayonidin rusiyening sanktpétérburgqa uchush jeryanida hadisige uchrap, 224 adem hayatidin ayrilghandin kéyin, bixeterlik nuqtisidin chiqish qilip, en'gliye öz sayahetchilirini qayturup kétishke bashlighan idi. Arqidin rusiyemu öz sayahetchilirini misirdin qayturup kélishke bashlidi.

Rusiye terepning bildürüshiche, misirda 80 ming rusiyelik sayahetchi bar bolup, ularning mutleq köp qisimi misirdiki sharm - esh sheyix we hurgad qatarliq sayahet orunlirida orunlirida dem alidiken.

Misir rusiyelik sayahetchiler eng köp baridighan memliketlerning biri bolup, 2014 - yili, 3 milyondin artuq rusiyelik sayahetchi misirgha barghan.

"A321" yoluchilar ayropilanining hadisige uchrash sewebi heqqide türlük qiyaslar otturigha chiqiwatqan bolup, rusiyening "Xewerler" uchur agéntliqining xewride misirning weqeni tekshürüsh komissiyesi mutexxesislirining "A321"ayropilanida bomba partlash yüz bergen bolushi éhtimalliqi barliqi, biraq buning téxi toluq ishenchilik emeslikini bildürgenlikim éytildi.

Weqedin kéyin en'gliye, ayroplanlarning misirgha we misradin en'gliyige uchushini toxtatqan. Rusiyemu, jüme küni ayroplanlarning misirgha uchushini toxtatqan.

Toluq bet