Rusiyening süriyediki nishanlargha qilghan hawa hujumi endishe qozghidi

Rusiye tashqi ishlar ministiri lawrof peyshenbe küni rusiye hawa armiyisining süriyediki nishanlargha qaratqan hawa hujumini aqlap, rusiye urush ayropilanlirining ittipaqdash küchlerge oxshash islam döliti nishanlirini bombardiman qilghanliqini ilgiri sürdi.

Biraq ittipaqdash döletler rusiye hawa hujumining nuqtiliq öktichi küchlerge qaritilghanliqidin, uning bu arqiliq besher esedke yardem qiliwatqanliqidin endishe qilishqa bashlidi.

Esed hökümitige qarshi urush qiliwatqan öktichi qoralliq küchlerning peyshenbe küni bildürüshiche, rusiye peyshenbe küni süriyening jisr el-shughur, xama, idlib, xoms qatarliq rayonliridiki öktichiler igilep turghan bazilarni bombardiman qilghan.

Liwa shughur el jabal qoralliq öktichi guruppisining bayanatchisi roytérs agéntliqigha bergen bayanatida, rusiye urush ayropilanliri bu guruppining idlibdiki bazisigha bashqurulidighan bomba atqanliqini bildürgen.

Amérika dölet mudapi'e ministiri ashton katér rusiyeni agahlandurup, “Uning herikiti otqa bénzin chachqanliq” dédi. Aq saray bayanatchisi jos érnist, rusiye diqqitini rast islam dölitige merkezleshtürse, u amérika bashchiliqidiki ittipaqqa hesse qoshqan bolidu, dep körsetti.

Rusiyening herikiti yene türkiyeni bi'aram qilghan. Türkiye peyshenbe küni rusiyening herikitidin qattiq endishe qiliwatqanliqini bildürgen. Biraq rusiye tashqi ishlar ministiri lawrof hawa hujumi esedke yardem bérishni meqset qilghanliqini ret qilip, “Térrorluqqa qarshi urush qiliwatimiz”dégen.