Русийә билән таҗикистан бирләшмә һәрбий маневир башлиди

Мухбиримиз үмидвар
2016-03-09
Share

Уйғур аптоном райони вә афғанистан билән чегрилинидиған таҗикистан җумһурийити чаршәнбә күни русийә билән бирлишип, кәң көләмдә бирләшмә һәрбий маневир өткүзүшкә киришкән.

Русийәниң интерфакис агентлиқиниң хәвәр қилишичә, русийә өзиниң маневирға қатнаштуридиған тошуш айропиланлири билән һәрбий аптомобилларни тәкшүрүш әтритини, һәрбий сақчи әтрәтлирини вә бир қисим әслиһәлирини дүшәнбигә елип кәлгән.

Русийә мәркизи һәрбий райони қоманданиниң ярдәмчиси полковник ярослав рошушкинниң билдүрүшичә, бирләшмә һәрбий маневирға таҗикистан дөләт мудапиә министирлиқи вә русийә мәркизи һәрбий райониниң башқармилири, җүмлидин моторлашқан қисимлар, танка вә топчилар қисми, алаһидә вәзипә қисми, парашутчилар вә парашутчи-һуҗумчилар қисимлири қатнишидикән. Әмәлий һәрбий маневирға йәнә күчлүк һава армийә гуруппилириму маслишидикән.

Русийә полковники рошушкин маневирниң усули һәққидә чүшәнчә берип, буниңда икки дөләт армийәсиниң өз-ара маслишип, тағлиқ районлардики қанунсиз қораллиқ күчләргә қарши бирликтә җәң қилиш, дүшмәнниң база, искилат вә башқа нуқтилирини йоқитиш усуллири қатарлиқларни көрситидикән.

Таҗикистанниң “асия-плус” агентлиқи, өткән һәптә русийә вә таҗикистан қораллиқ күчлириниң 15-20-март күни таҗикистанниң җәнубидики хатлон гарнизониға тәвә бәш һәрбий мәшиқ нуқтилирида маневир өткүзидиғанлиқини, бу маневирға икки дөләтниң 50 миң һәрбий хадими қатнишидиғанлиқини хәвәр қилған иди. Әмма, һазирғичә русийә тәрәптин қатнишидиған һәрбий хадимларниң сани техичә ениқ әмәс болсиму, әмма хәвәрдә йәнә бу бирләшмә маневирға русийәниң таҗикистанда турушлуқ 201-һәрбий базисиниңму қатнишидиғанлиқи әскәртилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт