Rusiye tajikistan'gha herbiy yardem béridu

Rusiye hökümiti tajikistan'gha 70 milyard rubli qimmitide herbiy yardem béridighanliqi we bu yardemlerni yéqin arida yetküzidighanliqini bildürgen.

Rusiye tashqi ishlar ministiri sérgéy lawrow 2 - april küni tajikistanni ziyaret qilghan bolup, rusiyening yardemliri lawrow ziyaritide éytilghan.

Rusiyening “Komérsant” gézitining yézishiche, rusiye we tajikistan ikki terep rehberliri arisidiki söhbette, rusiye tajikistan armiyesini zamaniwilashturushqa yardem körsitishke qoshulghan.

Rusiye tajikistan'gha herbiy alaqe, herbiy hawa üsküniliri we bashqa kéreklik herbiy eslihelerni béridiken.

Emma, moskwa bu yardemlerni kolléktip xewpsizlik shertnamisi ramkisi astida béridighanliqini eskertken.

Hazir rusiyening tajikistanda, 201 - nomurluq herbiy bazisi mewjut bolup, bu rusiyening chet'ellerdiki eng chong herbiy bazisi hésablinidiken. Rusiyening düshenbe, kulab, qorghantöbe qatarliq jaylardiki herbiy bazilarda 7 mingdin artuq herbiy xadim bar iken.