Русийә парахоти оқ чиқирип түркийә парахотиға агаһландуруш бәрди

Мухбиримиз үмидвар
2015-12-14
Share


12 - Айниң 13 - күни, йәни йәкшәнбә күни русийәниң бир қоғдиғучи парахоти түркийә туприқиға тутишидиған еге деңизиниң шималий районидики гретсийәниң лимнос арилиға 22 километир йеқин җайда түркийәниң бир белиқчи кемиси билән тоқунуш келип чиқиштин сақлиниш үчүн йеник қоралдин оқ чиқирип агаһландуруш бәргән.

Ройтерс агентлиқиниң хәвәр қилишичә, русийәниң мәзкур парахоти “сметливий” дәп аталған болуп, түркийә белиқчи кемиси билән мәзкур русийә қоғдиғучи парахотиниң арилиқи 600 метир қалғанда русийә парахоти оқ чиқирип агаһландуруш бериш арқилиқ икки парахотниң соқулуп кетишидин сақлинишқа мәҗбур болған.

Оқ чиқирилғандин кейин түркийә парахоти йөнилишини өзгәрткән.

Русийәниң“невсру” ториниң йезишичә, вәқәдин кейин, русийә дөләт мудапиә министирлики бу вәқә сәвәблик тезликтә түркийәниң русийәдики әлчиханисида турушлуқ һәрбий әмәлдарини чақиртип наразилиқ билдүргән.

Русийә мәнбәлириниң ейтишичә, русийә парахоти миң метир йирақтин түркийә парахотиниң өзи тәрәпкә келиватқанлиқини көргән, 600 метир қалғанда йеник қоралдин оқ чиқирип, пәқәт агаһландуруш арқилиқ парахоттиң соқулуп кетишидин сақланған, оқ чиқирилғандин кейин түркийә парахоти русийә тәрәп билән алақә қилмай, униң йенидин 500 метир арилиқ қалдуруп өтүп кәткән.

Әмма, бу вәқә һәққидә һазирғичә түркийә тәрәп рәсмий билдүрүш елан қилмиди.

11 - Айда түркийә һава армийәси русийәниң бир данә су - 24 типлиқ бомбардиманчи айропиланни етип чүшүргәндин кейин икки дөләт мунасивәтлири бирдинла җиддийлишип кәткән иди. Русийә тәрәп түркийәгә қарита имбарго чарилирини елан қилди. Һәтта русийәниң бир қанчә шәһиридики түркийә дипломатийә орунлириниң алдида наразилиқ намайишлири йүз бәрди.

Әслидә сода - иқтисадий, сиясий вә башқа һәр җәһәтләрдин алаһидә йеқин һәмкарлиқ орнитип келиватқан әнқәрә - москва мунасивәтлириниң бирдинла йириклишип назук һалға чүшүп қалғанлиқи һәр иккила дөләтниң алаһидә диққәт қиливатқан мәсилигә айланғанлиқи билдүрүлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт