Ukra'inaning qarshiliqi dunyawi qollashqa érishmekte

Muxbirimiz eziz
2022.03.07
Share on WhatsApp
Share on WhatsApp

Rusiye armiyesining ukra'inagha tajawuz qilishi xelq'araning küchlük eyiblishige duch kéliwatqanda, ukra'inaning qet'iy qarshiliq körsitish rohi dunya miqyasida omumiyyüzlük qollashqa érishishke bashlidi.

En'gliye radiyo shirkiti (BBC) ning 5-marttiki xewiride éytilishiche, amérika tashqiy ishlar ministiri antoni blinkén ependi ularning ziyaritini qobul qilghanda “Urushning qanchilik dawam qilishigha birnerse déyelmeymen. Emma ukra'inani jezmen meghlub bolidu, dep qarimaymen” dégen. Shuning bilen birge ukra'ina armiyesi we xelqining qet'iylik bilen qarshiliq körsitish rohigha yüksek baha bergen.

Amérika ammiwi radiyo shirkiti (NPR) ning 6-marttiki xewiride éytilishiche, rusiyening ukra'inagha tajawuz qilishi köp tereplime aqiwetlerni peyda qilmaqta iken. Bügün'giche az dégendimu 400 ge yéqin ukra'ina puqrasi rusiyening tajawuzchiliq urushida ölgen bolup, heqiqiy sanning buningdinmu köp ikenliki tekitlenmekte iken. Urush tüpeylidin hazirgha qeder bir yérim milyon ukra'inaliq musapir qoshna döletlerning chégrasidin ötken hemde yawropada ikkinchi dunya urushidin buyanqi eng zor musapirlar kirizisini peyda qilghan. Shuning bilen birge rusiyening özide besh mingche kishi rusiye prézidénti putinning ukra'inagha tajawuz qilishini eyiblep namayish qilghanliqi üchün tutqun qilin'ghan.

Amérika we yawropa döletlirining rusiyeni cheklesh üchün tengla ishqa salghan bir muhim tedbiri rusiyedin import qiliniwatqan bir qisim mehsulatlarni, jümlidin xam néfitni import qilishni toxtitish bolup, nöwette herqaysi jaylardiki bénzin bahasining tézdin örlep kétishige seweb bolmaqta iken.

Halbuki, rosiyening ukra'inagha hujum qilishi heqqide pul-mu'amile sahesidikilerning bezi özgiche qarashliri herqaysi axbarat wastilirining diqqitini qozghimaqta iken. CNBC Agéntliqining 7-marttiki xewiride éytilishiche, amérikiliq milyardér, “Pérshing meydani” shirkitining re'isi bil akman (Bill Ackman) bu heqte muxbirlargha söz qilip: “Üchinchi dunya urushini bashlinip ketti, désekmu xatalashmaymiz. Emma bizning buni étirap qilishimiz bek asta boluwatidu. Gherb dunyasining rusiyege dégendek qattiq bolmay kelgenliki putinning yürikini yoghiniwetken eng chong amil” dégen.

Melum bolushiche, nöwette rusiye hökümiti “NATO Bu ishqa biwaste arilashsa, biz yadro qoralini ishlitishke mejbur bolup qalimiz” dewatqanliqi üchün yawropaning bu urushqa biwaste qol tiqishi dégendek keng we emeliy bolmay kelmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.