Rusiye Uyghur rayonini su bilen teminlesh toghrisidiki östeng qurulushini toxtitip qoydi

Muxbirimiz erkin
2016-05-13
Élxet
Pikir
Share
Print

Rusiye yéqinda rusiyening altay jumhuriyiti arqiliq bir östeng qézip, Uyghur rayonini su bilen teminlesh qurulushini toxtatqan. Rusiye yéza igilik ministiri aliksandir tuxachéf, mezkur pilanning toxtitilghanliqini bildürgen.

Rusiye t a s s agéntliqining xewer qilishiche, aliksandér tuxachéf: "Xitayni su bilen teminlesh qurulushining yéqin kelgüside héchqandaq emeliy ijra'ati bolmaydu. Bu qurulushning rusiye ékologiyelik muhitigha körsitidighan tesiri qattiq tekshürülidu. Buningdin sirt, rusiyening dölet menpe'eti toluq közdin kechürülgendin kéyin, bu qurulushni qayta oylishishimiz mumkin" dégen.

Rusiyening Uyghur rayonini su bilen teminlesh pilani 5‏-ayning bashlirida ashkarilan'ghan. "Rusiye géziti" ning 3‏-maydiki xewiride, rusiye yéza igilik ministiri aliksandér tuxachéf shu küni xitay yéza igilik ministiri bilen ötküzgen söhbitide bu mesilini muzakire qilghanliqini, Uyghur rayonigha östeng qézip, xitayni su bilen teminlesh pikrini rusiye terepning otturigha qoyghanliqini bildürgen.

Emma bu pilan rusiyede qattiq tenqidke uchrighan. Rusiye penler akadémiyisi hédrologiye tetqiqat institutining mu'awin mudiri aliksandér grifin, "Bu qurulush héchqandaq tetqiqat we tekshürüshtin ötmey kallidiki xiyalgha qarapla chiqirilghan qarar" dégen.

Analizchilarning qeyt qilishiche, xitay hökümiti Uyghur rayonigha téximu köp xitay nopusi orunlashturushni közlep, rayonda sheherlishishni jiddiy qanat yayduruwatqan bolsimu, emma su mesilisi uning bu pilanigha tosqunluq qilip kelgen.

Toluq bet