Лавров русийәниң хитай билән бирликтә “йеңи демократик дуня тәртипи” бәрпа қиливатқанлиқини илгири сүргән

Мухбиримиз ирадә
2022.03.31
Share on WhatsApp
Share on WhatsApp

Русийә ташқий ишлар министири сергей лавров 30-март чаршәнбә күни хитайниң хуаңшән шәһиригә йетип кәлгән болуп, у бу йәрдә хитай ташқий ишлар министири ваң йи билән учришидикән.

Американиң “CBS хәвәрлири” (CBS News) ториниң хәвәр қилишичә, бу лавровниң русийә украинаға таҗавуз қилғандин буянқи тунҗи қетимлиқ чәт әл зиярити икән. Диққәт қозғайдиғини шуки, у бу зиярити мәзгилидә қилған сөзидә бейҗиң вә москваниң бирликтә “йеңи демократик дуня тәртипи” бәрпа қиливатқанлиқини илгири сүргән.

Лавров 30-марттики сөзидә дуняниң “хәлқара мунасивәтләр тарихидики интайин еғир басқучни баштин кәчүрүватқанлиқини” ейтқан. Русийә ташқий ишлар министирлиқи тәрипидин тарқитилған син хәвиридә лавров хитайни тилға елип туруп: “биз сиз билән, шундақла бизниң тәрәпдарлиримиз билән бирликтә көп қутуплуқ, адил, демократик йеңи дуня тәртипигә қарап илгириләймиз,” дегән.

Хитай ташқи ишлар министирлиқи тәрипидин тарқитилған ахбарат баянатида ваң йиниң төвәндики сөзлири нәқил елинған: “хитай-русийә мунасивити хәлқара вәзийәт өзгиришиниң йеңи синиқиға бәрдашлиқ берип, тоғра тәрәққият йөнилиши вә һәрикәтләндүргүч күчини намаян қилмақта. Дәрвәқә, хитай-русийә һәмкарлиқиниң чеки йоқ.”

Хитай ташқий ишлар министири ваң йи йәнә: “бизниң тинчлиқ үчүн тиришишимизниң, дөләт хәпвсизликини қоғдашимизниң вә зомигәрликкә қарши турушимизниң чеки йоқ,” дегән.

Украинаға таҗавузчилиқ уруши қозғап, авам хәлқниң өлүмигә вә милйонлиған кишиләрниң юрт-маканлиридин айрилишиға сәвәб болған русийәниң 3 милйонға йеқин уйғурни лагерларға қамиған вә ирқий қирғинчилиқ билән шуғуллиниватқан хитай һөкүмити билән бирликтә аталмиш “йеңи демократик дуня тәртипи” қуруп чиқиш һәққидики тәсәввурини оттуриға қоюши, диққәт қозғимақта.

Америка кеңәш палата әзаси марко рубийо техи йеқинда русийә вә хитайни американиң дөләт хәвпсизлики вә дуня тәртипи үчүн әң хәтәрлик тәһдит,” дәп көрсәткән иди.

Мәлум болушичә, русийә ташқи ишлар министири хитай саһибханлиқ қилидиған бир йүрүш йиғинларға қатнишип, афғанистанниң хәвпсизликини асас қилған бир қатар мәсилиләр һәққидә музакирилишидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт