Lawrow rusiyening xitay bilen birlikte “Yéngi démokratik dunya tertipi” berpa qiliwatqanliqini ilgiri sürgen

Muxbirimiz irade
2022.03.31
Share on WhatsApp
Share on WhatsApp

Rusiye tashqiy ishlar ministiri sérgéy lawrow 30-mart charshenbe küni xitayning xu'angshen shehirige yétip kelgen bolup, u bu yerde xitay tashqiy ishlar ministiri wang yi bilen uchrishidiken.

Amérikaning “CBS Xewerliri” (CBS News) torining xewer qilishiche, bu lawrowning rusiye ukra'inagha tajawuz qilghandin buyanqi tunji qétimliq chet el ziyariti iken. Diqqet qozghaydighini shuki, u bu ziyariti mezgilide qilghan sözide béyjing we moskwaning birlikte “Yéngi démokratik dunya tertipi” berpa qiliwatqanliqini ilgiri sürgen.

Lawrow 30-marttiki sözide dunyaning “Xelq'ara munasiwetler tarixidiki intayin éghir basquchni bashtin kechürüwatqanliqini” éytqan. Rusiye tashqiy ishlar ministirliqi teripidin tarqitilghan sin xewiride lawrow xitayni tilgha élip turup: “Biz siz bilen, shundaqla bizning terepdarlirimiz bilen birlikte köp qutupluq, adil, démokratik yéngi dunya tertipige qarap ilgirileymiz,” dégen.

Xitay tashqi ishlar ministirliqi teripidin tarqitilghan axbarat bayanatida wang yining töwendiki sözliri neqil élin'ghan: “Xitay-rusiye munasiwiti xelq'ara weziyet özgirishining yéngi siniqigha berdashliq bérip, toghra tereqqiyat yönilishi we heriketlendürgüch küchini namayan qilmaqta. Derweqe, xitay-rusiye hemkarliqining chéki yoq.”

Xitay tashqiy ishlar ministiri wang yi yene: “Bizning tinchliq üchün tirishishimizning, dölet xepwsizlikini qoghdashimizning we zomigerlikke qarshi turushimizning chéki yoq,” dégen.

Ukra'inagha tajawuzchiliq urushi qozghap, awam xelqning ölümige we milyonlighan kishilerning yurt-makanliridin ayrilishigha seweb bolghan rusiyening 3 milyon'gha yéqin Uyghurni lagérlargha qamighan we irqiy qirghinchiliq bilen shughulliniwatqan xitay hökümiti bilen birlikte atalmish “Yéngi démokratik dunya tertipi” qurup chiqish heqqidiki tesewwurini otturigha qoyushi, diqqet qozghimaqta.

Amérika kéngesh palata ezasi marko rubiyo téxi yéqinda rusiye we xitayni amérikaning dölet xewpsizliki we dunya tertipi üchün eng xeterlik tehdit,” dep körsetken idi.

Melum bolushiche, rusiye tashqi ishlar ministiri xitay sahibxanliq qilidighan bir yürüsh yighinlargha qatniship, afghanistanning xewpsizlikini asas qilghan bir qatar mesililer heqqide muzakirilishidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.