Америка ташқий ишлар министирлики русийә вә хитайға қарши тор идариси қурди

Мухбиримиз әзиз
2022.04.05
Share on WhatsApp
Share on WhatsApp

Хитай вә русийә һөкүмәтлириниң тор бошлуқидики рәқәмлик һакиммутләқлиқи барғансери әвҗигә чиқиватқанда, америка ташқий ишлар министирлики 4-апрел күни “тор бихәтәрлики идариси” ниң рәсмий қурулғанлиқи вә иш башлиғанлиқини җакарлиди. Мәзкур идариниң қурулуши билән америка ташқий ишлар министирлики бир қатар дипломатик хизмәтчиләр вә мутәхәссисләрни хизмәткә елиш арқилиқ мәсулийәтчан һөкүмәтләрниң тор бошлуқидики образиниң қандақ болушини намайән қилидикән. Шуниңдәк өз иттипақдашлириниң тор бихәтәрликигә һәмдәм болидикән.

CNN Ниң бу һәқтики хәвиридә ейтилишичә, америка ташқий ишлар министири антони билинкен әпәнди бу һәқтә сөз қилип: “украина вә русийәдә болуватқан ишлар бизниң рәқәмлик кәлгүсимизниң еғир хирисларға дуч келиватқанлиқини бәкму ашкара намайән қилди. Дуняви һәқләр вә демократик қиммәт қарашлириниң рәқәмлик һаятимизниң мәркизи болуши лазимлиқини техиму ениқ көрсәтти,” дегән.

Мәлум болушичә, америка ташқий ишлар министирликиниң нәччә онлиған хизмәтчилири қоллиниватқан “алма” янфонлири көп қетим тор һуҗумиға учрап, ғәрәзлик һалда тор вируси билән юқумландурулған. Йәнә келип нөвәттә көплигән кишилик һоқуқ дәпсәндичиликлири мушу хилдики тор бошлуқи җасуслуқи арқилиқ әмәлгә ашурулмақта икән. Тор бошлуқида бу хилдики җинайәтләрни садир қиливатқан хаккерларниң көп қисми бивастә һалда росийә вә хитайға четилидикән.

Мәлум болушичә, йеңидин қурулған бу идариға 2022-йилиниң ахириға қәдәр 100 нәпәр хизмәтчи қобул қилинидиған болуп, америка дипломатийә саһәсидики көзгә көрүнгән аял дипломатлардин җеннефер бакус (Jennifer Bachus) бу идариниң мувәққәт башлиқлиқини үстигә алидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт