Amérika tashqiy ishlar ministirliki rusiye we xitaygha qarshi tor idarisi qurdi

Muxbirimiz eziz
2022.04.05
Share on WhatsApp
Share on WhatsApp

Xitay we rusiye hökümetlirining tor boshluqidiki reqemlik hakimmutleqliqi barghanséri ewjige chiqiwatqanda, amérika tashqiy ishlar ministirliki 4-aprél küni “Tor bixeterliki idarisi” ning resmiy qurulghanliqi we ish bashlighanliqini jakarlidi. Mezkur idarining qurulushi bilen amérika tashqiy ishlar ministirliki bir qatar diplomatik xizmetchiler we mutexessislerni xizmetke élish arqiliq mes'uliyetchan hökümetlerning tor boshluqidiki obrazining qandaq bolushini namayen qilidiken. Shuningdek öz ittipaqdashlirining tor bixeterlikige hemdem bolidiken.

CNN Ning bu heqtiki xewiride éytilishiche, amérika tashqiy ishlar ministiri antoni bilinkén ependi bu heqte söz qilip: “Ukra'ina we rusiyede boluwatqan ishlar bizning reqemlik kelgüsimizning éghir xirislargha duch kéliwatqanliqini bekmu ashkara namayen qildi. Dunyawi heqler we démokratik qimmet qarashlirining reqemlik hayatimizning merkizi bolushi lazimliqini téximu éniq körsetti,” dégen.

Melum bolushiche, amérika tashqiy ishlar ministirlikining nechche onlighan xizmetchiliri qolliniwatqan “Alma” yanfonliri köp qétim tor hujumigha uchrap, gherezlik halda tor wirusi bilen yuqumlandurulghan. Yene kélip nöwette köpligen kishilik hoquq depsendichilikliri mushu xildiki tor boshluqi jasusluqi arqiliq emelge ashurulmaqta iken. Tor boshluqida bu xildiki jinayetlerni sadir qiliwatqan xakkérlarning köp qismi biwaste halda rosiye we xitaygha chétilidiken.

Melum bolushiche, yéngidin qurulghan bu idarigha 2022-yilining axirigha qeder 100 neper xizmetchi qobul qilinidighan bolup, amérika diplomatiye sahesidiki közge körün'gen ayal diplomatlardin jénnéfér bakus (Jennifer Bachus) bu idarining muweqqet bashliqliqini üstige alidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.