Хитай вә русийә бирләшмә һәрбий маневир өткүзиду

Хитай вә русийә бу йил 5-айда бирләшмә һәрбий маневир өткүзидиғанлиқини елан қилди. Хитай мудапиә министирлиқидин берилгән баянатқа қариғанда, һәрбий маневир оттура деңизда елип берилидиған болуп, униңға һәр икки дөләттин җәмий 9 һәрбий парахот қатнишидикән.

Мәзкур һәрбий маневирниң, америка тинч окян районидики дөләтләр билән болған һәмкарлиқни күчәйтиватқан вә японийә баш вәзири шинзо абениң америка зиярити техи йеңи аяғлашқан мәзгилдә елан қилиниши диққәт қозғиди. Бирақ хитай мудапиә министирлиқи бу һәрбий маневирниң үчинчи бир дөләтни нишан қилмиғанлиқини, буниң райондики вәзийәт биләнму алақиси йоқлуқини илгири сүргән.

Хитайниң җәнубий деңиздики араллар вә сенкаку араллири мәсилисидики иғвагәр позитсийиси башқа қошна дөләтләрни биарам қилишқа башлиған иди. Америка президенти барак обама сәйшәнбә күни япон вәзири шинзо абениң зиярити мәзгилидә қилған сөзидә, хитайни аралларниң игилик һоқуқ давасида үстүнлүкни игиләшкә урунуш билән әйиблигән иди.