Ши җинпиң русийәниң “игилик һоқуқи вә хәвпсизлики” мәсилисидә хитайниң москвани қоллайдиғанлиқини билдүргән

Мухбиримиз ирадә
2022.06.16
Share on WhatsApp
Share on WhatsApp

Хитай дөләт рәиси ши җинпиң хитайниң русийәниң хәвпсизликини қоғдайдиғанлиқини билдүргән.

CNN Телевизийәсиниң хәвәр қилишичә, 15-май чаршәнбә күни, хитай дөләт рәиси ши җинпиң росийә президенти путинниң туғулған күнини тәбрикләп қилған телефон сөһбитидә, русийәниң “игилик һоқуқи вә хәвпсизлики” мәсилисидә москвани қоллайдиғанлиқини қайта-қайта тәкитлигән.

Хәвәрдә ейтилишичә, ши җинпиң путинниң 69 яшқа киргән туғулған күнидики сөзидә, икки дөләт оттурисидики истратегийәлик һәмкарлиқни чоңқурлаштурушқа вәдә бәргән.

Кремил сарийидин тарқитилған баянатта бу һәқтә мундақ дейилгән: “икки дөләт рәһбәрлири икки тәрәп мунасивәтлириниң тарихтики әң юқири сәвийидә икәнликини вә кәң көләмлик өзара һәмкарлиқни изчил чоңқурлаштуруш ирадисигә кәлгәнликини қайта тәкитлиди.”

Мәлум болушичә, икки ши җинпиң билән путин оттурисидики бу телефон көрүшүши, русийә украинаға таҗавуз қилғандин кейинки иккинчи қетимлиқ телефон сөһбити болуп, сөһбәт һәр икки тәрәп үчүн һәмкарлиқини йәниму кеңәйтиш пурсити болған икән.

Ши җинпиң 16-июн күнидики телефон көрүшүшидә мундақ дегән: “бу йил киргәндин буян, икки дөләт мунасивити йәр шаридики давалғуш вә өзгиришләр алдида сағлам тәрәққиятини сақлап кәлди. Хитай русийә билән болған икки тәрәплик һәмкарлиқниң муқим вә узақ муддәтлик тәрәққиятиға түрткә болушқа тиришчанлиқ көрситиду. Хәлқара тәртип вә йәр шарини башқурушниң техиму адил вә мувапиқ йөнилишкә қарап тәрәққий қилишини илгири сүриду.”

Русийә украинаға таҗавуз қилғандин кейин, америка вә яврупа иттипақи русийәгә кәң көләмлик иқтисадий амбарго қойған иди. Бирақ хитай бу һәрикәтләргә қошулмайла қалмай, русийәниң таҗавузчилиқини “һәрбий һәрикәт” дәп атиған. Америка президенти байден вәқәдин кейин ши җинпиңни очуқ агаһландуруп, әгәр хитай русийәгә һәрқандақ шәкилдә ярдәм қилип, русийәниң җаза тәдбирлиридин қийналмай өтүвелишигә ярдәм қилса, ақивитиниң еғир болидиғанлиқини билдүргән.

Һалбуки, CNN телевизийәниң ейтишичә, кремил сарийи ши җинпиң билән путинниң 15-июн күнидики телефон сөһбтигә аит елан қилған баянатида мундақ дегән: “икки тәрәп ғәрб йолға қойған қанунсиз җаза сиясити сәвәбидин барғансери мурәккәплишип кетиватқан йәр шари иқтисадий вәзийитини көздә тутуп, енергийә, пул-муамилә, ишләпчиқириш вә башқа саһәләрдики һәмкарлиқни теииму кеңәйтишни қарар қилди.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт