Rusiyediki prézidént saylimida putinning utushi éniq bolmaqta

Yekshenbe küni rusiyede prézidént saylimi élip bérildi. Hazir wezipe ötewatqan prézidént putinni öz ichige alghan 8 namzat prézidént saylimigha chüshken bolsimu, lékin köpinche közetküchiler putinning bu qétimqi saylamda ghelibe qilip, rusiyeni yene 6 yil idare qilishida shek yoqluqini jezm qilishmaqta.

Putinning riqabetchiliri ichide esebiy milletchilik bilen tenqid qilin'ghan wladimir zhrinowskiymu bar. Bulardin bashqa yene rusiye tarixida tunji qétimliq ayal prézidént namzati kséniya sobchakmu bar. Öktichiler rehbiri we prézidént namzati nawalniy bolsa, türmige tashlinip, saylamgha qatnishishtin mehrum qilin'ghan. Mundaq ehwalda bu namzatlarning héchqaysisi putinning ghelibe qilishigha tehdit peyda qilalmaydiken.

Rusiye agéntliqlirining yézishiche, rusiyede 109 Milyon saylighuchi tizimgha élin'ghan bolup, yekshenbe küni rusiyening 11 rayonida bélet tashlash bashlan'ghan. B b s ning xewer qilishiche, moskwa waqti sa'et 17ghiche 51% adem bélet tashlap bolghan shuningdek maxachqala we bashqa bir qisim jaylardiki saylam ponkitlirida saylamgha xilap qilmishlar hem jédeller chiqqan. 

Bu yil 65 yashqa kirgen wladimir putin hakimiyetni igiligen 18 yildin buyanqi özining tötinchi nöwet prézidént bolushini kütmekte. Bu qétimqi prézidént saylimi rusiyening amérika bilen bolghan munasiwetliri téximu soghuqlashqan, gherbning rusiyege émbargo qoyushi bilen rusiye iqtisadi téximu nacharlashqan mezgilige toghra keldi. Uning üstige putinning rusiye öktichilirige qattiq zerbe bérip, rusiye démokratiyisining chékinishige seweb bolghanliqi xelq'araliq hoquq teshkilatliri teripidin tenqidlinip kélinmekte idi.