Xitay da'iriliri ormanchiliq nazaritining sabiq naziri memet abdullaning "Ikki yüzlimichilik" bilen jazalan'ghanliqini inkar qildi

Muxbirimiz erkin
2020-06-05
Share

Xitay da'iriliri bayanat élan qilip, Uyghur aptonom rayonluq ormanchiliq nazaritining sabiq naziri memet abdullaning "Ikki yüzlimichilik" bilen jazalan'ghanliqini inkar qildi we amérika taratqulirining bu heqtiki xewerlirini "Toqulma" dep tenqid qildi.

Uyghur aptonom rayonluq ormanchiliq nazaritining sabiq naziri memet abdulla 2017-yili xitay hökümitining Uyghur diyaridiki chong tutquni bashlan'ghan, nurghun Uyghur kadirlar "Ikki yüzlimichilik" bilen eyiblinip qolgha élin'ghan mezgilde tutqun qilin'ghan idi.

Bu tutqunda 3 milyondek Uyghur lagérlargha qamilip, köpligen Uyghur kadirlar qamaq jazalirigha höküm qilin'ghan idi. Sabiq nazir memet abdullaning amérikadiki perzentlirining ashkarilishiche, xitay da'iriliri uninggha 2019-yili séntebirde sot échip, ömürlük qamaq jazasigha höküm qilghan shundaqla uning hökümge naraziliq bildürüp qilghan erzinimu ret qilghan. Radiyomiz ilgiri uning "Ikki yüzlimichilik" bilen eyiblinip tutqun qilin'ghanliqini delilligen idi.

Lékin Uyghur aptonom rayonluq hökümet ötken 1-iyun küni axbarat élan qilip, memet abdullaning amérikadiki qizi sübhi memetke hujum qilghan. Sübhi memet yéqinda "Amérika awazi" radiyosining ziyaritini qobul qilghan idi. Xitayning "Yer shari waqti géziti" ning bildürüshiche, Uyghur aptonom rayonluq hökümetning bayanachisi élijan inayet sübhi memetning sözlirini "Pütünley toqulma, xelq'ara jama'et pikrini qaymuqturghanliq, dadisini qollighanliq, junggoning shinjang siyasitige hujum qilghanliq," dep eyibligen.

Uning ilgiri sürüshiche, memet abdulla "Parixorluq we hoquqidin paydilinip payda élish" bilen jazalan'ghan iken. Lékin memet abdulla buningdin 12 yil burun pénsiyige chiqqan bolup, élijan inayet pénsiyige chiqa'an bu kishining qaysi hoquqidin paydilan'ghanliqini chüshendürmigen. Uyghur kishilik hoquq teshkilatlirining ilgiri sürüshiche, xitay hökümiti Uyghur kadirlirini tazilashta "Ikki yüzlimichilik", "Parixorluq", "Hoquqini suyi'istémal qilish" dégendek namlardin paydilanmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet