Xitay hökümiti “Heqsiz salametlik tekshürüshi” ni dawam qilmaqta

“Aqsu axbarat tori” ning 13-noyabirdiki xewiride éytilshiche, aqsu wilayiti teweside ikki milyon'gha yéqin kishi “Heqsiz salametlik tekshürtüsh” xizmitige qatnashqan. Buning ichide balilar we yashinip qalghanlarmu bar iken.

Xewerdin melum bolushiche, bu xildiki “Heqsiz salametlik tekshürtüsh” ötken besh yildin buyan dawam qiliwatqan bolup, tekshürtküchining “Salametlik arxipi” birdek hökümetning “Ammiwi sehiye mulazimet sistémisi” gha kirgüzülgen. Shundaqla salametlik tekshürtkenlerning hemmisige birdek arxip turghuzush pirinsipi boyiche barliq kishilerning salametlik arxipi ularning xewiri bar yaki yoq bolushidin qet'inezer, birdek hökümetning sanliq melumatlar ambirigha toplan'ghan.

Ötken mezgillerdin buyan xitay hökümitining bu xildiki “Heqsiz salametlik tekshürtüsh” xizmitining emeliyette Uyghurlarning bi'ologiyelik uchurlirini toplash hemde téximu ünümlük kontrol qilish ikenliki heqqide türlük pikirler otturigha chüshken idi. Yene beziler bolsa bu xil tekshürüshning lagérlardiki “Adem organizimlirini oghrilash” qilmishining teyyarliqi ikenlikini algha sürüp kelgen idi. Nöwette bu xildiki tekshürüshning izchil dawam qilishi téximu zor gumanlarni qozghimaqta iken.