Қизилсу области 164 нәпәр чегра вә таможна сақчиси қобул қилидикән

Мухбиримиз қутлан
2018-01-20
Елхәт
Пикир
Share
Принт

Йеқиндин буян уйғур дияриниң чәтәлләр билән биваситә чегралинидиған вилайәт-областлири таможна вә чегра ишлири бойичә кәң көләмдә сақчи қобул қилиш еланлири чиқармақта.

Қизилсу областлиқ һөкүмәт торидин мәлум болушичә, 11-январ күни қизилсу областлиқ сақчи идариси җиддий уқтуруш чиқирип, област тәвәликидики чегра еғизлири вә таможна орунлири үчүн 164 нәпәр сақчи қобул қилидиғанлиқини билдүргән. Уқтурушта көрситилишичә, улардин 100 нәпири қизилсу областлиқ сақчи идарисигә, қалған 64 нәпири торғат чегра еғизиға қобул қилинидикән.

Уқтурушта әскәрликкә берип қайтип кәлгәнләр яки сақчи мәктипини пүттүргәнләрниң алдин ойлишилидиғанлиқи, намзатларниң архипида «миллий бөлгүнчилик» яки «диний әсәбийлик» кә четилидиған һәрқандақ җинайәт тарихиниң болмаслиқи тәләп қилинған.

Игилинишичә, қизилсу области афғанистан, таҗикистан вә қирғизистан қатарлиқ дөләтләр билән чегралинидиған болуп, йеқинқи йиллардин буян хитай һөкүмити чегра бихәтәрлики вә таможна ишлири бойичә мәзкур областқа зор соммилиқ иқтисадий селинма салмақтикән. Униңдин башқа хитай өлкилиридин сақчи, оқутқучи вә башқа хадимларни биваситә қобул қилиш ишиму әң дәсләп қизилсу областида башланғанлиқи мәлум.

Алдинқи йиллири или, бортала қатарлиқ чәтәлләр билән чегралинидиған областларму чегра еғизлири үчүн зор санда сақчи қобул қилған. Бортала областлиқ парткомниң торидин мәлум болушичә, 2017-йили январда бортала шәһәрлик сақчи идариси бир қетимдила 1000 нәпәр сақчи қобул қилған.

Көзәткүчиләр, уйғур дияридики чегра еғизлири вә таможниларға бу қәдәр көп сақчиниң қобул қилиниши хитайниң «бир йол, бир бәлвағ» қурулушиниң бихәтәрлики билән мунасивәтлик, дәп қаримақта.

Пикирләр (0)
Share
Толуқ бәт