Qizilsu oblasti 164 neper chégra we tamozhna saqchisi qobul qilidiken

Muxbirimiz qutlan
2018-01-20
Élxet
Pikir
Share
Print

Yéqindin buyan Uyghur diyarining chet'eller bilen biwasite chégralinidighan wilayet-oblastliri tamozhna we chégra ishliri boyiche keng kölemde saqchi qobul qilish élanliri chiqarmaqta.

Qizilsu oblastliq hökümet toridin melum bolushiche, 11-yanwar küni qizilsu oblastliq saqchi idarisi jiddiy uqturush chiqirip, oblast tewelikidiki chégra éghizliri we tamozhna orunliri üchün 164 neper saqchi qobul qilidighanliqini bildürgen. Uqturushta körsitilishiche, ulardin 100 nepiri qizilsu oblastliq saqchi idarisige, qalghan 64 nepiri torghat chégra éghizigha qobul qilinidiken.

Uqturushta eskerlikke bérip qaytip kelgenler yaki saqchi mektipini püttürgenlerning aldin oylishilidighanliqi, namzatlarning arxipida "Milliy bölgünchilik" yaki "Diniy esebiylik" ke chétilidighan herqandaq jinayet tarixining bolmasliqi telep qilin'ghan.

Igilinishiche, qizilsu oblasti afghanistan, tajikistan we qirghizistan qatarliq döletler bilen chégralinidighan bolup, yéqinqi yillardin buyan xitay hökümiti chégra bixeterliki we tamozhna ishliri boyiche mezkur oblastqa zor sommiliq iqtisadiy sélinma salmaqtiken. Uningdin bashqa xitay ölkiliridin saqchi, oqutquchi we bashqa xadimlarni biwasite qobul qilish ishimu eng deslep qizilsu oblastida bashlan'ghanliqi melum.

Aldinqi yilliri ili, bortala qatarliq chet'eller bilen chégralinidighan oblastlarmu chégra éghizliri üchün zor sanda saqchi qobul qilghan. Bortala oblastliq partkomning toridin melum bolushiche, 2017-yili yanwarda bortala sheherlik saqchi idarisi bir qétimdila 1000 neper saqchi qobul qilghan.

Közetküchiler, Uyghur diyaridiki chégra éghizliri we tamozhnilargha bu qeder köp saqchining qobul qilinishi xitayning "Bir yol, bir belwagh" qurulushining bixeterliki bilen munasiwetlik, dep qarimaqta.

Toluq bet