Xitayning "Nazaret döliti" berpa qilishi ghulghula qilinmaqta

Muxbirimiz eziz
2018-05-18
Élxet
Pikir
Share
Print

Xitay re'isi shi jinping hakimiyetni qolgha alghandin buyan pütkül xitay miqyasida "Nazaret méxanizmi" ni berpa qilip chiqqan bolsimu bu hal izchil herqaysi axbarat wasitiliride tenqidlinip kelmekte. 17-May küni "Wal strét zhurnili"da élan qilin'ghan zalmay xélilzad imzasidiki maqale ene shu xil pikirlerning biri hésablinidu.

Zalmayning maqaliside xitay hökümitining nöwette amérikining ornini bésip dunyawi qudret sahibi bolushqa urunuwatqanliqi hemde sifirliq téxnika saheside amérikidin éship chüshmekchi boluwatqanliqi, amérika hökümitining bu nuqtigha sel qarashigha bolmaydighanliqi janliq pakitlar asasida tepsiliy bayan qilinidu.

Maqalida körsitilishiche, xitay hökümiti 2017-yili yazda özlirining 2025-yiligha barghanda teqlidi eqil saheside dunyaning aldi bolmaqchi ikenlikini jakarlighan. Shuningdek puqralargha zulum qilish meqsitidiki "Nazaret döliti" sistémisini berpa qilip chiqqan. Buning bilen xitaydiki pütkül xelqning ijtima'iy we iqtisadiy uchurliri reqemleshtürülüp, ghayet zor miqdardiki xususiy uchurlar toplan'ghan. Xitay hökümiti bolsa del mushu uchurlargha bolghan mutleq kontrolluq hoquqini qolgha éliwélip, mushu arqiliq puqralarning pütkül herikitini yipidin yingnisigiche nazaret qilip turghan. Bolupmu milyonlighan kaméralarning ornitilishi, puqralarning téléfonlirigha mexsus eplerni mejburiy ornatquzup "Xeterlik" mezmunlarni tekshürüsh dégenler ene shuning jümlisidin iken.

Maqalida éytilishiche, nöwette xitay hökümiti bu xil "Nazaret méxanizmi"ni chet'ellerge kéngeytip amérika we yawropada sanliq melumat xakkérliqi bilen aktip meshghul bolmaqta iken. Bu bolsa amérika hökümitining menpe'eti we qimmet sistémisi üchün éghir tehdit peyda qilmaqta iken.

Aptor maqalisining axirida xitaydin kéliwatqan bu tehditke qarita amérika hökümitining zörür tedbirlerni élishi lazimliqini, jümlidin xitaygha qarita mehsulat béjini ashurush, xitayning amérikida teqlidiy eqil we sisahesige meblegh sélishini cheklesh, siyasiy jehette xitay bilen riqabetlishish hemde démokratik qimmetni qoghdash, xitaydiki "Nazaret döliti"ning bash kötirishini ashkara cheklesh qatarliqlarni otturigha qoyghan.

Toluq bet