Xitayning reqemlik "Saqchi döliti" gherb elliride endishe qozghimaqta

Muxbirimiz eziz
2018-06-01
Élxet
Pikir
Share
Print

Xitay hökümitining Uyghur diyarida "Saqchi döliti" sheklidiki kontrolluq sistémisi berpa qilghanliqi yéqindin buyan köp qisim gherb axbaratlirida yer éliwatqanliqi melum.

31-May küni "Iqtisadshunas" gézitide élan qilin'ghan bu heqtiki maqalida bu xil kontrolluqning gherb dunyasidiki kishiler tesewwur qilghandin nechche hesse éghir qabahet ikenliki tepsiliy bayan qilin'ghan.

Maqalida körsitilishiche, nöwette xitay hökümiti Uyghur diyaridiki kishilerning mangghan-turghinidin tartip, öy ichide némilerni qiliwatqanlirighiche hemmini közitip turuwatqan bolup, kishilerning héchqandaq shexsiyet hoquqi qalmighan. Emma bu xil nazaret gherb döletliridiki ehwalning eksiche kishilerning héchqandaq ijazitini almighan ehwalda dawam qilmaqta iken.

Bu ehwalni aptor "Hakimmutleq hökümet bolghan xitay döliti reqemlik nazaret arqiliq shinjang rayonini qabahetlik saqchi dölitige aylandurup qoyghan, emma gherb döletliride bu xil wasitiler peqet térrorluqning aldini élishta qollinilidu," dep teswirleydu.

Aptorning bayan qilishiche, reqemlik inqilabning xaraktéri nazaret méxanizimigha özgirip ketkende sanliq melumatlarni misli körülmigen derijidiki asanliq we cheksiz zor kölemde toplashqa yol échilidiken. Nöwette bu hal Uyghur diyarida eynen otturigha chiqqan bolup, teqlidiy eqil buninggha yandashmaqta iken. Buning bilen nöwette sabiq sherqiy gérmaniye dewridiki "Saqchi döliti" de royapqa chiqqan nazarettin nechche hesse éghir bolghan nazaret Uyghurlarni "Iriqchi saqchi döliti" ning hökümranliqigha duchar qilmaqta iken.

Maqalida bayan qilinishiche, nöwette Uyghur diyaridiki hakimmutleqliqni xitayning héchqandaq yéride tapqili bolmaydighan bolup, bir qarashtila perq etkili bolidighan Uyghurlarni basturush pütkül xitay xelqini kontrol qilishtin köp asan bolghan shekilde dawam qilmaqta iken.

Toluq bet