Бейҗиңда "сақчи бихәтәрлик әслиһәлири хәлқаралиқ көргәзмиси" ечилған

Мухбиримиз ирадә
2018-05-31
Share

Ройтерз агентлиқиниң хәвәр қилишичә, бейҗиңда ечиливатқан "сақчи бихәтәрлик әслиһәлири хәлқаралиқ көргәзмиси" дә уйғур елида йолға қоюлуватқан юқири техникилиқ назарәт вә тәқиб сестимлири көргәзмә қилинишқа башлиған.

Мәлум болушичә, бейҗиңда ечиливатқан бу көргәзмидә хитайдики нурғунлиған техника ширкәтлири өзлири ишләпчиқарған түрлүк юқири техникилиқ үскүниләр, бихәтәрлик камералири, қол телефон сканирлаш үскүниси, учқучисиз айропиланларни көргәзмә қиливатқан болуп, бу көргәзминиң асаслиқ херидарлириму һәрқайси җайлардин кәлгән сақчилар икән.

Ройтерз агентлиқиниң хәвиридә хитайниң шямин вә бейҗиң шәһәрлиридики техника ширкәтлири тәрипидин ясалған қол телефон секанирлаш әпи үстидә мәхсус тохталған. Көргәзмидики ширкәт хадимлири бу үскүниниң қол телефон вә компутерларға қачилинидиған фәйсбок вә тивиттер қатарлиқ 90 дин артуқ әпләрдә сақлинип ятқан учурларни, һәтта өчүрүветилгән учурларниму көрәләйдиғанлиқини илгири сүргән. Йәниму муһими, бу ширкәтләр бу үскүниниң һазирғичә әң бихәтәр дәп қариливатқан алма телефонлириниң иос системисиға бөсүп кирәләйдиғанлиқини билдүргән.

Уйғур елидин мәхсус бу көргәзмигә кәлгән гу фамилилик бир сақчи ройтерз агентлиқиниң мухбириға қилған сөзидә "шинҗаңда бу үскүнә аллиқачан ишлитилмәктә. Мән пәқәт бу әпниң алма телефонлириниң системисиғиму кирәләйдиғанлиқиға қизиқип қалдим," дегән.

Дәрвәқә, хитай сақчилириниң уйғур елида йолларда тосуқ қуруп өткән-кәчкән уйғурларниң қол телефонлирини бир хил үскүнә арқилиқ тәкшүрүдиғанлиқи хели бурунла чәтәл мухбирлири тәрипидин хәвәр қилинған иди. Хәлқара кишилик һоқуқ органлири хитай һөкүмитини уйғур елини "юқири техникилиқ назарәт дөлитиниң тәҗрибиханиси" қиливалғанлиқини әйибләп кәлмәктә.

Уйғур елидиму 2013-йилидин буян юқириқиға охшайдиған "террорлуққа қарши күрәш қилиш әслиһәлири йәрмәнкиси", "явро-асия бихәтәрлик үскүнилири көргәзмиси" қатарлиқ көргәзмиләр ечилип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт