Béyjingda "Saqchi bixeterlik esliheliri xelq'araliq körgezmisi" échilghan

Muxbirimiz irade
2018-05-31
Élxet
Pikir
Share
Print

Roytérz agéntliqining xewer qilishiche, béyjingda échiliwatqan "Saqchi bixeterlik esliheliri xelq'araliq körgezmisi" de Uyghur élida yolgha qoyuluwatqan yuqiri téxnikiliq nazaret we teqib séstimliri körgezme qilinishqa bashlighan.

Melum bolushiche, béyjingda échiliwatqan bu körgezmide xitaydiki nurghunlighan téxnika shirketliri özliri ishlepchiqarghan türlük yuqiri téxnikiliq üsküniler, bixeterlik kaméraliri, qol téléfon skanirlash üskünisi, uchquchisiz ayropilanlarni körgezme qiliwatqan bolup, bu körgezmining asasliq xéridarlirimu herqaysi jaylardin kelgen saqchilar iken.

Roytérz agéntliqining xewiride xitayning shyamin we béyjing sheherliridiki téxnika shirketliri teripidin yasalghan qol téléfon sékanirlash epi üstide mexsus toxtalghan. Körgezmidiki shirket xadimliri bu üskünining qol téléfon we komputérlargha qachilinidighan feysbok we tiwittér qatarliq 90 din artuq eplerde saqlinip yatqan uchurlarni, hetta öchürüwétilgen uchurlarnimu köreleydighanliqini ilgiri sürgen. Yenimu muhimi, bu shirketler bu üskünining hazirghiche eng bixeter dep qariliwatqan alma téléfonlirining i'os sistémisigha bösüp kireleydighanliqini bildürgen.

Uyghur élidin mexsus bu körgezmige kelgen gu famililik bir saqchi roytérz agéntliqining muxbirigha qilghan sözide "Shinjangda bu üsküne alliqachan ishlitilmekte. Men peqet bu epning alma téléfonlirining sistémisighimu kireleydighanliqigha qiziqip qaldim," dégen.

Derweqe, xitay saqchilirining Uyghur élida yollarda tosuq qurup ötken-kechken Uyghurlarning qol téléfonlirini bir xil üsküne arqiliq tekshürüdighanliqi xéli burunla chet'el muxbirliri teripidin xewer qilin'ghan idi. Xelq'ara kishilik hoquq organliri xitay hökümitini Uyghur élini "Yuqiri téxnikiliq nazaret dölitining tejribixanisi" qiliwalghanliqini eyiblep kelmekte.

Uyghur élidimu 2013-yilidin buyan yuqiriqigha oxshaydighan "Térrorluqqa qarshi küresh qilish esliheliri yermenkisi", "Yawro-asiya bixeterlik üsküniliri körgezmisi" qatarliq körgezmiler échilip kelmekte.

Toluq bet