Cherchen nahiyesi xitay ölkiliridin 300 neper saqchi xadimi qobul qilidiken

Muxbirimiz shöhret hoshur
2018-08-15
Élxet
Pikir
Share
Print

Cherchen nahiyelik xelq hökümitining toridin melum bolushiche, cherchen nahiyelik da'iriler xitay ölkiliridin 300 neper saqchi xadimi qobul qilidighanliqi toghrisida uqturush chiqarghan.

Uqturushta qobul qilinidighan saqchilargha öy yardem puli, qishliq issinish puli we qoshumche mukapat puli qétilip, ayda 10 ming yüen'ge yéqin ma'ash bérilidighanliqi bayan qilin'ghan.

Uyghur aptonom rayonigha nisbeten kichik bir nahiye hésablinidighan, 70 ming nopusluq cherchen nahiyesining bir qétimdila 300 saqchi qobul qilishi, uning üstige bu sanning pütünley xitayning ichki ölke-sheherliridin qobul qilinidighanliqi muhajirettiki Uyghur közetküchilerning diqqitini tartmaqta.

Muhajirettiki Uyghur közetküchiler buning bir jiddiy siyasiy weziyetning éhtiyajidin boluwatqanliqini yaki yighiwélish lagérlirining yenimu uzun mezgil dawamlishidighanliqining ishariti ikenlikini ilgiri sürmekte.

Qizilsu oblastliq siyasiy qanun komitétimu 14-awghust küni saqchi xadimi qobul qilidighanliqi heqqide uqturush chiqarghan. Emma uqturushta imtihan'gha qatnashqan namzatlarning isim-familisi, millet teweliki we bashqa shexsiy uchurliri bérilmey, peqet kimlik nomurila bérilgen. Jedwelde körsitilgen qizilsu oblastining siyasiy-qanun we uniwérsal tüzesh sahesi boyiche ayrim-ayrim idarilerge qobul qilinidighan xadimlar sanini qoshup hésablighanda jem'iy 922 neper kishige yétidiken.

Uyghur aptonom rayonining weziyiti heqqide yéqinqi aylarda xelq'arada élan qilin'ghan xewer-maqalilerde Uyghur diyarida qobul qiliniwatqan saqchilarning adettin tashqiri köplüki rayondiki weziyetning yamanlishiwatqanliqining muhim pakiti süpitide tilgha élin'ghan idi.

Toluq bet