Xitay da'iriliri Uyghur rayonigha saqchi we oqutquchi qobul qilishni dawamlashturmaqta

Muxbirimiz erkin
2018-11-12
Élxet
Pikir
Share
Print

Xitay da'iriliri Uyghur rayonidiki mektep we amanliq organlirigha oqutquchi we saqchi qobul qilishni dawamliq kéngeytmekte.

Yéqinda qaghiliq nahiyesi bu nahiyediki ottura-bashlan'ghuch we yeslilerge 500 neper oqutquchi qobul qilidighanliqini élan qilghan. Oxshash mezgilde aqtu nahiyesi 97 neper yardemchi saqchi qobul qilish élani chiqarghan.

Bu yuqiriqi ikki nahiyening bu yil ichide az dégende 2-qétim oqutquchi yaki yardemchi saqchi qobul qilish élani chiqirishidur. Aqtu nahiyesi téxi bu yil 5‏-ayda 500 neper yardemchi saqchi qobul qilish élan chiqarghan.

Qaghiliq nahiyesi bu yil 1‏-ayda mezkur nahiyege 2968 neper oqutquchi qobul qilidighanliqini élan qilghan idi.

Chet'el mutexessislirining doklatlirida körsitilishiche, Uyghur aptonom rayoni xitayning ma'arip we amanliq sélinmisi eng téz köpeygen rayonidur.

Amérikidiki jéymis town fondi jem'iyiti yéqinda élan qilghan bir doklatida, xitayning Uyghur diyaridiki bixeterlikke serp qiliwatqan xirajiti 2017-yili 20 milyard yüen ashqanliqi, buning ötken mezgildikige qarighanda üch hesse köpeygenlikini bildürgen. Shundaqla bu heqtiki doklatlarda yene ma'arip sélinmisi xitayning eng aldinqi qatardiki rayon'gha aylan'ghanliqi tekitlenmekte. Lékin Uyghur kishilik hoquq teshkilatlirining ilgiri sürüshiche, ma'arip sélinmisining yuqiri bolushini Uyghur ana tilining cheklinip, xitay tili we xitay medeniyitining Uyghurlargha mejburiy téngilishi keltürüp chiqarghan. Bu, zor kölemlik xitay oqutquchilar qoshunigha bolghan éhtiyajni peyda qilghan.

Xitay hökümitining 20017‏-yildin bashlap Uyghur rayonida "Dölet tili" da sözlesh, "Jungxu'a medeniyiti" ni qobul qilish herikiti qozghap, Uyghurlargha xitay tili, hetta örp-adetlirini tangghanliqi ilgiri sürülmekte. Lékin, bu xelq'arada 2‏-dunya urushidin buyanqi eng zor kölemlik "Medeniyet qirghinchiliqi" dep eyiblendi.

Yuqiriqi her ikki nahiyening uqturushida qeyt qilinishiche, yardemchi saqlar aqtu tewesidin élinidiken, lékin qaghiliq nahiyesige élinidighan oqutquchilar nishanliq ichkiridin qobul qilinidiken.

Toluq bet