Saqchi da'iriliri Uyghur diyaridiki tor abunitlirini tiktok qatarliq eplerni qachilimasliq heqqide agahlandurdi

Xitayning Uyghur diyaridiki saqchi da'iriliri mexsus widiyoluq uqturush tarqitip , rayondiki tor abunitlirini tiktok, X yeni burunqi tiwéttér, yutub, bitkoyin qatarliq ijtima'iy alaqe eplirini yüklimeslikni, yükligenlerning qanuniy jawabkarliqqa tartilidighanliqini agahlandurghan. Uyghur diyaridiki j x tarmaqlirining doyin qatarliq ijtima'iy alaqe supilirida tarqatqan élanlirida agahlandurushiche, eger tor abunitliri yuqiriqi ijtima'iy taratqu eplirini qachilisa qolgha élinidiken, 15 ming yüen jerimane qoyulup, ijtima'iy ishench kréditidin 40 nomur tartilidiken.

 Xitay hökümet emeldarliri  tiktok, X yeni tiwéttér, linkidin, féysbuk, yutyub qatarliq ijtima'iy alaqe supilirida hésab échip, Uyghur irqiy qirghinchiliqi we mejburiy emgekni inkar qilishta keng paydiliniwatqan bolsimu, lékin Uyghur diyaridiki j x tarmaqlirining uqturush chiqirip, tor abunitlirini agahlandurushi, bolupmu xitayning bayt dens shirkitige qarashliq tiktokningmu chet'el shirketliri qatarida agahlandurulushi diqqet qozghimaqta.

Rayondiki xitay j x tarmaqlirining bu agahlandurushi, Uyghur aptonom rayonluq partkomning ötken hepte mexsus yighin chaqirip, “Shinjanggha munasiwetlik mexpiyetliklerni qattiq qoghdash” ni telep qilishining arqisidinla élan qilin'ghan. Xitay da'irilirining “Shinjanggha munasiwetlik mexpiyetliklerni qattiq saqlash” ni telep qilishi we arqidinla j x tarmaqlirining tor abunitlirini agahlandurushi, Uyghurlargha “Irqiy qirghinchiliq” qilish bilen eyibliniwatqan xitayning, buninggha a'it téximu köp delillerning ashkarilinip kétishidin endishe qilidighanliqini körsitidu, dep qaralmaqta. Buning aldida rayondiki j x tarmaqliri  altay, chöchek, aqsu qatarliq jaylardin nurghun kishilerning torda “Ösek söz” tarqitish bilen eyiblinip jazalan'ghanliqini bildürgen. J x tarmaqlirining agahlandurushiche, rayondiki tor abunitlirining “Meyli qandaq meqsette bolsun” chégra sirtidiki tor béketlirige kirishning hemmisi “Tosuq atlap torgha chiqish qilmishi” hésablinidiken.