Хитай корла шәһири билән чәрчән наһийәсигә 2300 дин артуқ иштат сиртида сақчи қобул қилиш елани чиқарған

Хитай даирилири уйғур аптоном райониниң бәзи җайлирида сақчи қобул қилишни изчил давамлаштурмақта.

Даириләр йеқинда корла шәһири билән чәрчән наһийәсигә 2300 дин артуқ иштат сиртида сақчи қобул қилидиғанлиқини елан қилған. Корла шәһири вә чәрчән наһийәлик һөкүмәт торлириниң еланида қәйт қилинишичә, иштат сиртидики бу сақчи хадимлириниң 2000 нәпири корла шәһиригә, 320 нәпири чәрчән наһийәсигә қобул қилинидикән.

Корла шәһири билән чәрчән наһийәсиниң уқтурушида йеңи қобул қилинидиған хадимларниң қулайлиқ сақчи понкитлирида вәзипә өтәйдиғанлиқи тәкитләнгән.

Хитай һөкүмити 2017-йили башланған чоң тутқунниң алди-кәйнидә райондики сақчи органлириға кәң көләмлик сақчи қобул қилишқа башлиған. 2016-Йили районға 90 нәччә миң сақчи қобул қилинип, кейинки йили чоң тутқун башлинип кәткән иди. Хитай даирилириниң бу қетим корла вә чәрчән наһийәлиригә немә үчүн бунчилик көп иштат сиртида сақчи қобул қилидиғанлиқи мәлум әмәс. Лекин бәзи көзәкүчиләрниң илгири сүрүшичә, уйғур аптоном районидики әң чоң лагерларниң бири корлада икән.

Чәрчән наһийәсиниң уқтурушида бу орунға илтимас қилған кишиләрниң арқа көрүнүши қаттиқ тәкшүрүлидиғанлиқи, аилисидики 3 әвлад кишиләр ичидә аталмиш “миллий бөлгүнчилик”, “диний әсәбийлик”, “зораван террорлуқ” вә “дөләт бихәтәрликигә зиян йәткүзүш” билән әйиблинип җазаланғанларниң қобул қилинмайдиғанлиқи тәкитләнгән. Бәзи таратқуларниң йеқинда хәвәр қилишичә, хитайниң чоң тутқуни башланған йеқинқи бир қанчә йилда корланиң нопуси зор дәриҗидә азийип кәткән икән.