Уйғур елигә барған чәтәллик мухбирлар сахта «машина вәқәси» вә сахта «саяһәтчи» ләрниң тосқунлуқиға учриған

Мухбиримиз ирадә
2019-06-27
Елхәт
Пикир
Share
Принт

Йеқинда фирансийә агентлиқиниң мухбирлири уйғур елидики лагерлар һәққидә учур игиләш үчүн зиярәткә барған. Улар 6 күнлүк зиярити давамида хитай даирилириниң райондики әмәлийәтни йошуруш үчүн қолидин кәлгән барлиқ амалларни ишқа селиватқанлиқини көргән.

Фирансийә агентлиқиниң бу һәқтики хәвиридә көрситилишичә, хитай һөкүмити гәрчә өткән йили 10-айдин башлап һәрқайси дөләтләрниң дипломатлирини вә ахбарат органлирини уйғур елини вә аталмиш «қайта тәрбийә мәркәзлири» гә қарита тәшкиллик зиярәтләргә орунлаштуруватқан болсиму, бирақ улар мухбирларниң районни өз алдиға мустәқил һалда зиярәт қилишини қаттиқ чәклигән иди. Болупму улар мухбирларниң лагерларға беришиниң алдини елиш үчүн лагерға баридиған йолларда сахта «машина вәқәси» пәйда қилиш вә яки «йол қурулуши» қиливатқандәк қилип көрситиш арқилиқ мухбирларниң сәпәр қилишиға тосқунлуқ қилған.

Хәвәрдә көрситилишичә, фирансийә агентлиқи мухбирлири атуштики мәсчитләрниң вәйран қилиниш әһвалини тәкшүрмәкчи болуп йолға чиққанда туюқсизла йолда пәйда болған сақчилар уларни тосуп бу йолда «синақ» елип бериливатқанлиқини илгири сүргән. Мухбирлар хотәндики бир лагерға йеқинлашқинида туюқсизла йол тақалған вә бир машина келип йолни қомурушқа башлиған вә у йол 5 күн бойичә әслигә кәлтүрүлмигән. Саяһәтчи қияпитигә киривалған кишиләрму давамлиқ уларға әгишивалған.

Фирансийә агентлиқи хәвиридә хитай һөкүмитиниң шәһәрниң һәммила йерини назарәт камералири орнитиш арқилиқ мухбирларниң һәрикитиниму қаттиқ назарәт қилидиғанлиқини, уларниң бирәр кишини тепип айрим зиярәт қилишиниң алдини алғанлиқини баян қилған. Фирансийә агентлиқи мухбирлири қәшқәрдики мәзгилидә улар ятақта йоқ вақитта ятиқиға бири кирип, сомкилирини ақтурған. Гәрчә уларниң һечнемиси йүтүп кәтмигән болсиму, мухбирлар буниң өзлиригә берилгән агаһландуруш сигнали икәнликини мөлчәрлигән.

Пикирләр (0)
Share
Толуқ бәт