Uyghur élige barghan chet'ellik muxbirlar saxta "Mashina weqesi" we saxta "Sayahetchi" lerning tosqunluqigha uchrighan

Muxbirimiz irade
2019-06-27
Élxet
Pikir
Share
Print

Yéqinda firansiye agéntliqining muxbirliri Uyghur élidiki lagérlar heqqide uchur igilesh üchün ziyaretke barghan. Ular 6 künlük ziyariti dawamida xitay da'irilirining rayondiki emeliyetni yoshurush üchün qolidin kelgen barliq amallarni ishqa séliwatqanliqini körgen.

Firansiye agéntliqining bu heqtiki xewiride körsitilishiche, xitay hökümiti gerche ötken yili 10-aydin bashlap herqaysi döletlerning diplomatlirini we axbarat organlirini Uyghur élini we atalmish "Qayta terbiye merkezliri" ge qarita teshkillik ziyaretlerge orunlashturuwatqan bolsimu, biraq ular muxbirlarning rayonni öz aldigha musteqil halda ziyaret qilishini qattiq chekligen idi. Bolupmu ular muxbirlarning lagérlargha bérishining aldini élish üchün lagérgha baridighan yollarda saxta "Mashina weqesi" peyda qilish we yaki "Yol qurulushi" qiliwatqandek qilip körsitish arqiliq muxbirlarning seper qilishigha tosqunluq qilghan.

Xewerde körsitilishiche, firansiye agéntliqi muxbirliri atushtiki meschitlerning weyran qilinish ehwalini tekshürmekchi bolup yolgha chiqqanda tuyuqsizla yolda peyda bolghan saqchilar ularni tosup bu yolda "Sinaq" élip bériliwatqanliqini ilgiri sürgen. Muxbirlar xotendiki bir lagérgha yéqinlashqinida tuyuqsizla yol taqalghan we bir mashina kélip yolni qomurushqa bashlighan we u yol 5 kün boyiche eslige keltürülmigen. Sayahetchi qiyapitige kiriwalghan kishilermu dawamliq ulargha egishiwalghan.

Firansiye agéntliqi xewiride xitay hökümitining sheherning hemmila yérini nazaret kaméraliri ornitish arqiliq muxbirlarning herikitinimu qattiq nazaret qilidighanliqini, ularning birer kishini tépip ayrim ziyaret qilishining aldini alghanliqini bayan qilghan. Firansiye agéntliqi muxbirliri qeshqerdiki mezgilide ular yataqta yoq waqitta yatiqigha biri kirip, somkilirini aqturghan. Gerche ularning héchnémisi yütüp ketmigen bolsimu, muxbirlar buning özlirige bérilgen agahlandurush signali ikenlikini mölcherligen.

Toluq bet