Савән наһийәсиниң бир кәнтидики пүтүн мәсчитләр чиқиветилгән, мәсчиткә ианә бәргәнләр тутқун қилинған

Мухбиримиз әркин
2019.02.18

Савән наһийәсиниң люшого кәнти 210 миң нопуслуқ мәзкур наһийәдики типик мусулман кәнти болуп, даириләр 2018‏-йили бу кәнттики 3 мәсчитни чеқип ташлиған, униңға ианә бәргән мусулманларни тутқун қилған.

Италийәдики “зимистан” намлиқ кишилик һоқуқ ториниң 15‏-феврал ашкарилишичә, йәрлик даириләр өткән тили 2‏-айда “террорлуққа қарши туруш вә муқимлиқни сақлаш” намида мәзкур кәнтниң 4 нәпәр имамини тутқун қилған. Шу йили 10‏-апрел күни бу кәнттики 3 мәсчитни чеқип түп-түр қиливәткән.

Хәвәрдә, даириләрниң мәсчиткә ианә бәргән мусулманларниң тизимликини тепивелип, уларни бир-бирләп тутқун қилғанлиқи вә җәмий 43 нәпәр кәнт пуқрасиниң тутқун қилинғанлиқини билдүргән.

Хәвәрдә баян қилинишичә, даириләр әркәкләрни тутқун қилиш билән чәклинип қалмай, пүтүн кәнттики аялларниң һәр күни кәнт комитетиға келип, “сиясий өгиниш” кә қатнишишини тәләп қилған. Хәвәрдә йәнә люшуго кәнтидики мәсчитләр чеқилған 10‏-апрел күни қошна җяхези кәнтидики мәсчитләрниңму чеқиветилгәнлики, униңға қошна йәнә бир кәнт-әнҗихәйдики бир мәсчит сақлап қелинған болсиму, бирақ униң қуббиси елип ташлинип, панус есилғанлиқи һәм ишикигә қулуп селинғанлиқини билдүргән.

Люшуго кәнтидики бир йәрлик туңган пуқрасиниң “зимистан” ториға билдүрүшичә, тутқунлар “өзгирип, өзиниң дини етиқадидин ваз кәчмигүчә қоюп берилмәйдикән.” у компартийәниң һазир муқимлиқтин башқа һечқандақ иш билән чатиқи йоқлиғини билдүрүп, “компартийә пүтүн туңган вә уйғур мусулманлирини тутуп болғандин кейин, динға етиқад қилидиған хитайларни тутушқа башлайду” дегән.

Хитайниң рәсмий санлиқ мәлуматлирида көрситилишичә, савән наһийәсиниң нопуси 210 миң болуп, туңган, қазақ вә уйғурлар мәзкур наһийә нопусиниң үчтин бир қисмини тәшкил қилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.