Ilham toxtining qizi, saxarof mukapati dadisining teqdirini özgertishke yardemde bolushini ümid qildi

Yawropa saxarof kishilik hoquq mukapatining namzati, xitay türmisidiki öktichi ziyaliy ilham toxtining amérikida oquydighan qizi jewher ilham, saxarof mukapati ilhamning teqdirini özgertishke yardemde bolushini ümid qildi.

Bu, ilham toxti saxarof mukapatigha namzatliqqa tallan'ghandin béri, uning a'ile tawabi'atining tunji qétim buninggha inkas qayturushidur. Jewher ilham bu sözlerni jüme küni “Amérika awazi” radi'osining ziyaritini qobul qilghanda tekitligen.

Uning qeyt qilishiche,, dadisining saxarof mukapatigha namzatliqqa körsitilishi uning qilghan xizmetlirining étirap qilinishiken. U, ögey apisi we özining buningdin nahayiti xursen bolghanliqini bildürgen.
Yawropa parlaménti yéqinda ilham toxti qatarliq 4 kishining 2016‏-yilliq saxarof kishilik hoquq mukapatigha namzatliqqa tallan'ghanliqini élan qilghan. Yawropa parlaméntining qarari Uyghur we xitay kishilik hoquq pa'aliyetchilirining qarshi élishigha érishken idi.

Jewher ilham, saxarof mukapatigha namzatliq dadisining teqdiride ijabiy özgirish peyda qilishini kütidighanliqini bildürüp, biraq “Bu, hazirqi ehwalni özgertelmigen teqdirdimu, emma téximu nurghun kishi dadamning ötken nechche yillardin béri némige küresh qilghanliqini bilip qalidu” dégen.

Xitay hökümiti ilham toxtini 2014‏-yili 1‏-ayda béyjingda qolgha alghan. Shu yili 9‏-ayda “Milliy bölgünchilik” bilen eyiblep, ürümchide muddetsiz qamaq jazasigha mehkum qilghan idi.