Yawropa parlamént ezasi saxarof mukapatini ilham toxtigha bérishke chaqirdi

Muxbirimiz erkin
2016-10-07
Share

6-Öktebir, yawropa parlaméntida bu yilliq saxarof pikir erkinliki mukapatining namzatlirini tonushturush yighini ötküzüldi. Yighinda yawropa parlamént ezasi ilxan küchük, ilham toxtining saxarof mukapatigha eng muwapiq namzat ikenlikini, mukapatning uninggha bérilishini telep qilghan.

Yighinda, bu yilliq saxarof mukapatigha namzat 5 kishining terjimihaligha da'ir qisqa filim qoyulup, ularning ish -herikiti yawropa parlaménti tashqi siyaset komitéti, tereqqiyat komitéti we kishilik hoquq komitétigha tonushturulghan.

Yighinda, ilxan küchük ilham toxtini namzatliqqa körsetken 43 neper yawropa parlamént ezasigha wakaliten söz qilip, uning xitay tilida tor échip, Uyghurlar bilen xitaylar otturisidiki öz-ara chüshenche we alaqini algha sürüp kelgenlikini tekitlidi.

U, shunga “U saxarof we bu mukapatning ghayisige wekillik qilidu. U bu mukapatqa eng muwapiq namzat. Parlaméntining saxarof mukapatini uninggha bérishini ümid qilimiz. Shundaq qilghanda parlamént özining Uyghurlar we xitay kishilik hoquq ishlirigha bolghan qollishini namayan qilidu” dégen.

Ilham toxtini öz ichige alghan 5 kishi bu yilliq saxarof pikir erkinliki mukapatigha tallan'ghan. Yawropa parlaménti 11‏-öktebir 5 neper namzat ichidin 3 kishini tallap, 27‏-öktebir mukapat sahibini élan qilidu.

Ilham toxti tonushturulghan 5 minutluq filimda, amérika qelemkeshler merkizining re'isi pétér gadwén, amérikiliq tibetshunas, proféssor élli'ot spérling, saxarof mukapati sahibi, xitay pa'aliyetchi xu jya qatarliq kishiler söz qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet