Xitay hökümiti her yili 488 milyon parche saxta uchur tarqitidiken

Muxbirimiz jüme
2016-05-21
Share

Blumbérg torining xewer qilishiche, xitay hökümiti öz puqralirining sezgür siyasiy munazire we selbiy xewerlerge diqqet aghdurushini tosush üchün her yili ijtima'iy alaqe torlirigha 488 milyon parche saxta uchur tarqitidiken.

Xewerge qarighanda, bu melumatlar yéqinda xarward uniwérsitéti xitayning tor we ijtima'iy alaqe wasitiliridiki teshwiqat herikiti heqqide hazirlighan bir tetqiqat doklatida ashkarilan'ghan.

Doklatni gary king qatarliq üch neper tetqiqatchi birliship teyyarlighan. Bu doklat xitayda "50Sint partiyesi" dep atalghan teshwiqat ishchiliri üstidin élip bérilghan tunji sistémiliq tetqiqat hésablinidiken.

Melum bolushiche, bu teshwiqatchilar torda pikir yazghanda, teqrizchiler bilen biwasite munazirige chüshüp qélish we chet'el hökmetlirini mesxire qilishtin saqlinidiken.

Eksiche ular tordashlarning diqqitini aktip we qiziq munazire témiliridin chéchip, ijabiy, hökümetni maxtaydighan, xitay kommunist partiyesining inqilabiy tarixini yaqilaydighan baharni yézish bilen meshghul bolidiken.

Xewerge qarighanda, bu xildiki uchurlarni yazghuchilar xitay tordashlar arisida mesxirilik halda "50Sint partiyesi" dep atalsimu, emma ularning heq alghanliqigha a'it uchurlar éniq emes iken. Bu xildiki teshwiqatchilarning köpinchisi sot, kadirlar bashqarmisi we baj idarisi qatarliq organlarda ishleydighan hökümet xadimliri bolup, tetqiqatchilarning periziche, torda saxta inkas yollash ularning xizmet mes'uliyitining bir qismi bolushimu mumkin iken.

Bu xil teshwiqatchilar xitayda chong tiptiki weqeler yüz bergende birdinla jiddiy heriketke ötishidiken.

2013 - Yili 26 - iyul pichanda saqchixanigha hujum qilish weqesi, 28 - iyul uchturpanda saqchi xadimini yarilandurush weqeliri yüz bergen idi.

Xewerge qarighanda, 2013 - yili Uyghur élida qarashliq heriketliri yüz bergen mezgilde yeni shu yili iyulda xitay kompartiyesi we sabiq inqilabiy qehrimanlarni medhiyilesh yazmiliri tor yüzini birdinla qaplashqa bashlighan.

Xewerde doklatni teyyarlashqa qatnashqan tetqiqatchilarning éytqanliridin neqil élip xewer qilishiche, "Nöwettiki xitay hakimiyiti chet'el düshmen küchlirining herbiy tajawuzchiliqigha qarighanda, öz xelqi qozghaydighan ichki topilanglardin bekrek qorqidu" ken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet