Сайрагүлниң сиясий панаһлиқ илтиҗаси «йиғивелиш лагерлири» ниң қисмән сирини ачқан

Мухбиримиз әзиз
2018-07-31
Елхәт
Пикир
Share
Принт

Бу йил апрел ейида уйғур дияридин қазақистанға қечип барған сайрагүл савутбай 21-майда «чеградин қанунсиз өткән» дегән җинайәт билән әйиблинип, қазақистан бихәтәрлик хадимлири тәрипидин қолға елинған иди. Йеқинда алмута областиға қарашлиқ яркәнт шәһиридә өткүзүлгән сотта сайрагүл өзини хитайға қайтурмаслиқни тәләп қилип, қазақистан һөкүмитидин сиясий панаһлиқ тилигән. Шуниң билән биргә өзиниң уйғур дияридики «тәрбийиләш мәркизи» намида мәвҗут болуватқан лагерларниң биридә хитай тарихидин дәрс өтүшкә мәҗбурланғанлиқи һәмдә бу җәрянда ашу лагерда көргәнлири һәққидә мәлумат бәргән.

«Пул-муамилә вақти» гезитиниң 31-июл саниға бесилған бу һәқтики мақалида көрситилишичә, сайрагүл өзиниң баянатида уйғур дияридики лагерлар вә униң ички қисмидики әһваллар һәққидә мәлумат бәргән һәмдә буларниң «дөләт мәхпийити» һесаблинидиғанлиқини, буни ашкарилиған кишиләрниң қаттиқ җазаға учрайдиғанлиқини тәкитлигән. Униң ери ислам ували бу һәқтә сөз қилип: «һазир у йәрдикиләр (уйғур дияридикиләр) бу мәркәзләрдики қаттиқ башқурушниң қайси дәриҗигә барғанлиқини билмәйду. Шуниңдәк қанчилик кишиләрниң бу җайларда өлүп кәткәнлики яки сараң болуп қалғанлиқини техиму билмәйду. Билгәнләрму бу һәқтә еғиз ачалмайду. Чүнки улар бу һәқтә бирәр еғир сөзләпла қойса балаға қалғини шу» дегән.

Хитайниң қазақистанда турушлуқ баш әлчиси җаң вей бу һәқтә тохтилип: «нөвәттә бир қисим кишиләр аммиви сорунларда вә торларда ялған-явидақларни ойдуруп, шинҗаңниң вә хитай һөкүмитиниң хәлқарадики образиға қара сувимақта» дегән. 

Мәлум болушичә, сайрагүл қазақ болуп, униң ери вә икки балиси қазақистан пуқраси икән. Бу һәқтики сотниң ахирқи һөкүми техи елан қилинмиған болуп, сотчилар сайрагүлниң өзини қазақистанда җинайи ишлар бойичә җазалаш, хитайға қайтурмаслиқ һәққидики тәлипини рәт қилған. Сот мәһкимисиниң бу һәқтики муһакимиси 1-авғустта қайта башлинидикән.

Пикирләр (0)
Share
Толуқ бәт