Германийәниң бу йиллиқ "нюренберг кишилик һоқуқ мукапати" лагер шаһити сайрагүл саутбайға берилгән

Мухбиримиз әркин
2021-03-01
Share

Германийәниң 2021-йиллиқ "нюренберг кишилик һоқуқ мукапати" шиветсийәдә турушлуқ қазақ лагер шаһити сайрагүл саутбайға берилгән. "җәнубий германийә" гезитиниң хәвәр қилишичә, "нюренберг кишилик һоқуқ мукапати" ниң баһалаш комитети тәпсилий музакирә елип бериш арқилиқ сайрагүл саутбайни бу мукапатқа лайиқ көргән. Хәвәрдә комитет әзалириниң бирдәк аваз берип, сайрагүл саутбайниң "қайил қиларлиқ җасарәт" билән хитайдики мусулман аз санлиқ милләтләр үчүн тик турғанлиқи, "уйғур вә қазақларға қаритилған җинайәтни паш қилғанлиқи" үчүн бу мукапатни униңға беришни тоғра тапқанлиқи тәкитләнгән.

Сайрагүл саутбай буниң алдида америка ташқи ишлар министирлиқиниң "җәсур аяллар" мупакатиға еришкәниди. Сайрагүл саутбай илгири уйғур елиниң моңғолкүрә наһийәсидики бир хитай җаза лагерида мәҗбурий лагер оқутқучиси болуп ишлигән. У 2018-йили қазақистанға қечип чиқип, панаһлиқ тилигән болсиму, бирақ қазақистан униңға панаһлиқ беришни рәт қилған. Шуниң билән у 2019-йили шиветсийәниң сиясий панаһлиқиға еришип, аилиси билән шиветсийәгә берип олтурақлашқан. Бу җәрянда у лагердики хорлаш вә басқунчилиқ қилмишларни ашкарилап, зор ғулғула қозғиғаниди.

Мәзкур мукапат германийә һөкүмити хитайниң уйғур вә башқа түркий хәлқләргә қаратқан "ирқий қирғинчилиқи" ға сүкүт қилиш билән әйиблиниватқан мәзгилдә сайрагүлгә берилгән. "җәнубий германийә" гезитиниң хәвиридә көрситишичә, нюренберг шәһәр башлиқи маркус көниг хитайниң бу мукапат сәвәблик инкас билдүрүши мумкинлики, бирақ нюренберг шәһириниң хитай билән "музакирә елип бериш" ни үмид қилидиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт