Хитай бир қисим даңлиқ сәнәткарларға сотсиялизм тәрбийиси беришкә башлиған

Мухбиримиз җүмә
2017-12-02
Share

Хитай даирилири хитайдики бир қисим даңлиқ кино режиссорлири, кино артислири вә нахша чолпанлирини бир йәргә йиғип, уларға сотсиялизм тәрбийиси беришкә башлиған.

“вашингтон почтиси гезити” ниң хәвәр қилишичә, мушу мәқсәттә бу һәптидин буян хаңҗу шәһиригә топланған 100 дин артуқ сәнәткар хитай рәиси ши җинпиң 19-қурултайда сөзлигән “хитайчә сотсиялизм йеңи дәвргә кирди” дегән нутуқниң роһини өгинишкә орунлаштурулған.

Хәвәргә қариғанда, буларниң арисида хитайдики иҗтимаий таратқуларда 42 милйон мәстаниси бар даңлиқ нахша чолпини лухән, хитайда көзгә көрүнгән вә 77 милйон тор мәстаниси бар кино чолпини яңми қатарлиқлар бар икән.

Хәвәрдә көрситишичә, даириләрниң даңлиқ сәнәткарларни топлап ши җинпиңниң сөзлирини өгинишкә орунлаштуруши, хитай коммунист партийәсиниң хитайдики барлиқ саһәләргә қаритилған контроллуқни йәнә бир балдақ күчәйткәнликиниң намайәндиси икән. 

Хәвәргә қариғанда, мәзкур курс җәрянида бир қисим даңлиқ артислар ши җинпиңниң “йеңи дәвәр” идийисини яқилайдиғанлиқидин билдүрүшкән. 

Әмма курс сиртидики йәнә көплигән сәнәткар вә язғучилар сотсиялистик контроллуқниң дөләтниң иҗадчанлиқ роһини урғутушниң орниға, уни тунҗуқтуридиғанлиқини ейтишқан.

Хәвәрдә нәқил қилишичә, бу һәқтә тохталған нәнҗиңлиқ һөҗҗәтлик филим режиссори ху җйе сәнәткарларни партийә билән бирдәкликини сақлашқа мәҗбурлашниң мустәқил иҗадийәт роһиға зит икәнликини билдүргән.
У мундақ дегән: “һакимийәт бешидики партийә һәммә нәрсидин тәшвиқат йочуқи издәпла йүриду. Бу йеңи иш әмәс. Өтмүштә бешимиздин өткән бу усуллар әмдиликтә бүгүнимизгә суқунуп киришкә урунуватиду. Контрол қилиш һәр заман мәғлуп болуп кәлгән, әмма бу нөвәт у йәнә чиңиватиду.”

Әдәбият-сәнәтни сотсиялизм үчүн хизмәт қилдуруш пикри ши җинпиң үчүн бир йеңилиқ әмәс. У 2014-йили өктәбирдики бир нутқидиму шундақ бир идийәни алға сүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт