Qazaqistan sot mehkimisi sérikjan bilash'oghligha qaritilghan mirzaqamaqni yene bir ay uzartqan

Muxbirimiz erkin
2019-06-07
Élxet
Pikir
Share
Print

Qazaqistan paytexti nursultandiki bir sot mehkimisi 7‏-iyun küni Uyghur rayonidiki qazaqlarning kishilik hoquq pa'aliyetchisi, "Atayurt" teshkilatining rehbiri sérikjan bilash'oghlini sotlap, uning uning mirzaqamaq jazasini yene bir ay uzartqan. Bu uning mirzaqamaq jazasining buning bilen bir qanche qétim uzartilishidur.

Merkizi pragadiki "Azadliq radiyosi" ning xewer qilishiche, sérikjan bilash'oghili 10‏-iyulgha qeder mirzaqamaqta tutup turulidiken. Sot mehkimiside bilash'oghlining nurghun qollighuchiliri qollirida in'glizche, rusche, qazaqche we xitayche lozunkilarni kötürüp, uning mirzaqamaqtin boshitilishini telep qilghan.

Bilash'oghli bu yil 3‏-ayda almuta shehiride qolgha élinip, "Étnik öchmenlikke qutratquluq qilish" bilen eyiblen'gen. U shu qétimqi tutqunda qazaqistan paytexti nursultan shehirige élip kétilgen idi.

Bilash'oghli qazaqistanda "Ata yurt" namliq kishilik hoquq teshkilati qurup, Uyghur rayonida xitay hökümiti teripidin tutqun qilin'ghan qazaqlarning qoyup bérilishini telep qilghan. Uning tutqundiki qazaqlarning a'ile ezalirini teshkillep, guwahliq bérish herikiti qozghishi xelq'ara taratqularda ghulghula qozghighan. Uning herikiti xitay hökümitini qattiq bi'aram qilghan shundaqla qazaqistan da'irilirini osal ehwalgha chüshürüp qoyghan.

Qazaqistanning almuta shehiridiki bir sot mehkimisi uni bu yil 2‏-ayda bir qanunsiz teshkilatqa rehberlik qilish bilen eyiblep, uninggha 670 dollar jerimane qoyghan. Uning adwokati ayman ömerowa yéqinda namelum kishilerning tehditige uchrighan. "Azadliq radiyosi" ning xewiride qeyt qilinishiche, bilash'oghli "Ata yurt" teshkilatining Uyghur rayonidiki qazaqlarning kishilik hoquqni qoghdashni dawamlashturidighanliqi, "Ata yurt" teshkilatini qazaqistan edliye ministirliqigha qayta tizimgha aldurushqa tirishidighanliqini bildürgen. Sérikjan bilash'oghli bu yil 3‏-ayda tutqun qilin'ghanda uning "Ata yurt" teshkilati" mu péchetlen'gen idi.

Toluq bet